Khawzawlah ruihhlo hâl ral

Khawzawl District Drug Disposal Committee bultumin nimin khan Khawzawl KVK hmunah April-June 2026 chhunga Police, Excise leh tlawmngai pawlte'n ruihhlo an man cheng nuai 413 hû hâl ral a ni a; ruihhlo mana police thawhpuite leh hriatpuitu (witness)-a ṭang mi 21 hnenah lawmman hlan a ni bawk.

Ruihhlo hâlna inkhawm hi Khawzawl additional SP Zosangliana'n a kaihruai a, SP F Lalbiakzauva leh Sub-Hqrs YMA president PC Rosiama ten an hmanpui. Ruihhlo hâlte chu - methamphetamine kg 1.972 (Rs 1,57,76,000 hû) leh heroin (no 4) kg 1.283 (Rs 2,56,00,000 hû) a ni. Ruihhlo hâl takte kaihhnawihah mi 17 man an ni a, Khawzawl Police Station-ah thubuai 15 ziah luh a ni.

Khawzawl district-ah hian kumin January aṭanga August thla kal mek chhungin methamphetamine kg 20.568 leh heroin gram 936.7 man a ni tawh a; mi 39 man niin, an zingah kum tling lo pahnih an tel a, NDPS Act hnuaiah thubuai 26 ziah luh a ni. Kumina ruihhlo man zawng zawng chu Rs 18,53,44,000 hûa chhût a ni.