FCSCA dept-in an officer-te tan Consumer awareness an buatsaih

Food, Civil Supplies & Consumer Affairs (FCSCA) department chuan nimin khan Aijal Club-ah 'Consumer Awareness for District Officers' an buatsaih a; FCSCA additional director C Zadailova chuan, district tina Supply officer-te chu mi tin ban phak leh mipuite’n vuivâina an thlen ngamna ni turin a chah.

C Zadailova chuan, district tina FCSCA officer leh thawktute chu a bulṭhut aṭanga mipui (consumer)-te dikna chanvo kengkawhtu an nih thu a sawi a, "Inthlahdah loin theihtawp chhuah u la, mi tin ban phak leh mipuite’n vuivaina an thlen ngamna ni rawh u," a ti. Bûk tling ngeia mipui hnenah bungrua a thlen theih nan endik taima chhuah tur leh data dik neih tum turin a fuih bawk.

Zirhona hi FCSCA deputy director Esther Leihang-in a kaihruai a, district tin aṭangin FCSCA officer-te leh thawktu dang mi 30 an tel. Ukil T Lalnunsiama'n 'Lok Adalat and Mediation: Procedure & Advantages' tih thupui a zirtir a, zawhna leh chhanna leh sawihona hun hman a ni.

Consumer Awareness hi vawiinah chhunzawm a ni dawn a, ‘Handling of consumer complaints’ tih te, ‘Smart PDS’ tih leh, ‘Awareness on Consumer Related Acts & Laws’ tih te an zirho ang.