Lunglei dist-ah family pension surrender mi pariat an awm tawh

Lunglei district-ah dan phal loha family pension la mi pariatin sorkarah an pension lakna (PPO) an pe kir (surrender) tawh a; Lunglei district-ah hian family pension la mi 1,815 awm mekin, thla khata pension an lak chu cheng nuai 442 vel a ni.

Nimin khan Lunglei District Treasury Office chuan Lunglei Convention Centre Hall-ah Mizoram sorkar hnuaia dan phal loha family pension late'n mahni duh thua pension an lakte tihtawp theihna tura Mizoram sorkarin ngaih hnathiamna hun a hawn mek chungchang inhrilhfiahna, 'District Level Sensitisation Programme on Voluntary Surrender of Pension Payment Orders (PPOs)' an buatsaih a; Lunglei High Powered Committee (HPC) vice chairman V Malsawmtluanga, Lunglei North bialtu MLA-in a hmanpui.

Zirhonaa tarlan danin, tun dinhmunah Lunglei District Treasury Office hnuaiah pensioner 4,228 awm mekin, thla khata hlawh an lak zat belhkhawm chu cheng nuai 1,340 chuang a ni a; family pension la mi 1,815 awm bawkin, family pension-a thla khata pek chhuah zat chu cheng nuai 442 chuang a ni.

July 1, 2026-a PPO surrender-na hun hawn aṭanga nimin thleng khan chhan hrang hrang pali avangin family pension surrender mi pariat an awm tawh a, he'ng mi pariatte'n thla khata pension an lak zat belhkhawm chu Rs 1,47,674 a ni.

Mizoram sawrkar chuan danin a phal loh leh document dik lo hmanga family pension late tan July 1 - September 30, 2026 chhung mahni duh thu ngeia pek kir (surrender) theihna hun a hawng a ni.