KHAWTHLIR
MLA-in tlawh
East Tuipui bialtu MLA Ramthanmawia chuan nimin khan Khawbung damdawi-in (PHC) leh Eklavya Model Residential School sak mek a tlawh a, hna thawh mek dan a enfiah. MLA hian nimin vêk khan August 19-22, 2026 chhunga Khawbung community hall-a khelh tur Tuipuiral Badminton Championship 2026 a hawng bawk.
Lirthei khalhtute SP-in a vaukhàn
Lawngtlai SP Dheeraj Dwarka Gaadhi chuan hriattirna chhuahin, "Lirthei neitu emaw, mi tu pawhin driving licence nei lo emaw, kumtlinglo lirthei a vawntir/khalhtir chuan lirthei neitu leh khalhtirtu chu Rs 5,000 chawitir emaw, kum thum thleng lung-in tàn leh a pahnih hmanga hrem theih a ni," a ti. Tunlaiin Myanmar nena insumdawn tawnna a kal nasa a, driving licence nei mumal lo leh rûi chunga lirthei khalh ṭhin an awm tih hriat a nih thu a tarlang bawk.
Hnahthial dist-ah HIV kai mi 315
Hnahthial District AIDS Prevention & Control Committee chu an chairman K Vanlalruati, district bawrhsap kaihhruaiin nimin khan an ṭhukhawm a; August 2026 thleng khan ICTC data aṭangin Hnahthial district khua leh tui HIV hrik pai mi 315 hmuh chhuah an nih tawh thu tarlan a ni.
Birth & death DLCC thukhawm
Mamit District Level Co-ordination Committee on Civil Registration of Births & Deaths chuan district bawrhsap Suvigya S Chandra kaihhruaiin nimin khan tun hnaia birth certificate delayed registration application thehlut an pun chungchanga hmalak dan tur an rêl a; DC chuan India khua leh tui dik takte chauh India khua leh tui nihna pek tur a nih thu a sawi.
ACP target 25.44% zo tawh
Kolasib additional DC B Malsawmtluangi kaihhruaiin nimin khan District Consultative Committee (DCC) an ṭhukhawm a; April - June, 2026 chhung khan Annual Credit Plan (ACP) target zinga 25.44% tihhlawhtlin a nih tawh thu leh, June 2025 nena khaikhin chuan cheng nuai 2,183.65-in hmasawnna a awm thu tarlan a ni.