KMMTTP leh rél kawngin a nghawng tur zir chiangtute'n CM-ah report an thehlut

Impact Study Committee on KMMTTP and Railway Link between Bairabi and Sairang chuan nimin khan chief minister Lalduhoma hnenah an zir thil chianna final draft report an thehlut.

Chief Minister chuan, Impact Study Committee chu lawmthu hrilhin, "Thla 12 chhunga report thehlut tura tih in nih laiin thla 10-ah in rawn inpeih thei a, in thawkrim tih a chiangin ka hria. Bawhzui ngaite sorkarin a bawhzuina kawngah Study Team thawhpuina kan mamawh zui zel dawn," a ti a, sorkar thawhpui zel turin a ngen.

Impact Study Committee report tlangpui (situational analysis and field study) sawiho nghal a ni a; Mizoram leh Myanmar ramria insumdawn tawnna kal dan leh kal zel dan tur te, Mizoram sorkarin a hlâwkpui theihna tura dan anga chhiah lak dan tur te, Mizorama tharte ram danga hlâwk zawka thawn chhuah dan turte sawiho a ni.

Study Committee hotute chuan, tunah pawh Mizorama sumdawngte leh lirtheia eizawng (logistic service)-te'n an hlâwkpui hle tawh thu sawiin, "Mizo sumdawngte hian Zakhai ṭawng emaw Káwl ṭawng an hman theih phei chuan tun aiin an hlâwkpui lehzual ang," an ti a; khawtlang himna leh dan zawm kawngah mipui zirtir uar a ṭul thu an sawi.

KMMTTP hi kum 2027-a hawn a nih dawn chuan chak taka hmalakna tur a tam hleah Study Committee chuan an ngai. Tuna Zochachhuah leh Salachhuaha sumdawngte'n an mamawh an sawi tam ber chu kudam a ni a, Zokhawthar lama mite sawi langsar ber chu Indo - Myanmar - Thailand corridor tihhlawhtlin a nih thu CM an hrilh.

Sairang thlenga rêl a tlanin a nghawng (impact) an zirnaah, ILP ṭha taka kenkawh a tul thu an tarlang a, "Mizoram chhunga rêl kawngin a paltlang khuate'n hlâwk zawka rêl an chhawr theih nan rel station tinte approach road ṭha neih a ṭul," an ti a; Sairang leh Aizawl inkara taxi chuan man to lutuk vangin mi tam takin rêl an chhawr ṭangkai tâwk loh thu pawh an sawi.

Impact Study Committee hian Arunachal Pradesh, Nagaland leh West Bengal an tlawh a, Nagaland an kalnaah thla rei lote rêlin Mizoram a tlawh hnua Impact Study Team, Mizoram sorkarin din nachang a hria chu entawn tlak an tih thu an lo hrilh a ni.

Committee hi an chairman T Lalhlimpuia, MLA chuan a ho a, member secretary Zomuana leh member dangte an tel. An report kimchang chu a buin an siam a, an zirchianna tinah rawtna an siam zel a, a taka bawhzui kawngah sorkar an thawhpui zui zel dawn a ni.