PWD Minister-in Ngaizel khâm a enfiah: 'Nghet leh daih rei zawk turin siam kan tum' - PWD Minister

PWD minister Vanlalhlana chuan nimin khan Ngaizel khâma hnathawh a enfiah a; Ngaizel khama lung a lak loh nan leh lung tlain mipui tan harsatna a siam loh nan nghet leh daih rei zawk turin a venna siam tum a nih thu a sawi.

PWD Minister hi Geology & Mining department, DMR department, PWD leh Aizawl District Disaster Response Team (ADDRT) hotute'n an ṭawiawm. Lung tla ṭhin laka kawngpui âna awmte leh kawngpui hmangtu mipui leh lirtheite an him zawk nan ADDMA, PWD, Geology & Mining ten lung tla mai thei tur an kar thlak (scaling) tawhte leh lung tlate direct taka kawngpuia an tlak lohna tura kopang/khâm tuam hna (draping) thawhte an enfiah a ni.

Vanlalhlana chuan, khâm chu cement-a phuhna shotcrete khawl hmanga nghet leh daih rei zawk tura siam rem tum a nih thu a sawi a, "Shotcrete khawl leina man cheng vbc 2.4 te a ni a, DMR lamin permanent zâwka he hmun hlauhawm hi siam theih nan DPR an buaipui mek a, tuna mi hi chu rei vak lo chhûng atana siam a ni," a ti.

PWD Minister chuan, Ngaizel khâm min ṭhinin harsatna a thlen nasat thu sawiin, "Harsatna, chhiatna, in leh loh chânna leh mihring nunna hial chânna a lo thlen tawh ṭhin a, kum 20 zet chu min tibuai tawh. Sorkarin theihtâwp a chhuah a, thawktute pawh an fakawm a, a tira a hlauhawm ang em em khan a hlauhawm tawh rih lo," a ti a, hmalak zel tum a nih thu a sawi.

Geology & Mining-a geologist pahnih V Lalbiakmawia leh Benjamin Roluahpuia chuan Ngaizel khâm an buaipui dan an sawifiah a, "Khâm hi a bal tur ang ang chu hriat phâk chinah tihtlak a ni tawh a, tunah chuan tlâk hlauhawm zualpui a tla zo tawhah kan ngai. Kan khuhna hi Agronet 75% UV ray dâltu a ni a, ruah leh nî laka humhim a pawimawh," a ti a; lung lian lêm lo tla thlengin a hlauhawm avangin a vèn tel thu an sawi bawk.

Geologist-te sawi danin, Ngaizel khâm tuamna atana an hman hi Green Draping High Density Poly Ethylene (HDPE) a ni a, ruah leh ni sá lakah leilung a ven bakah, leivûng leh lung lian lutuk lo chu dang zo tura beisei a ni. Mizorama vawi khat hmanna a nih avangin, a daih rei zawng tur erawh sawi theih a ni lo.

Ngaizel khâm/ko tuam nan hian Green Draping HDPE hlûm (roll) 13 hman niin, cheng nuai 19 sên a ni a; Green Draping HDPE hi ADDMA-in an lei a ni.

Kum 10 kal ta chhung khan Ngaizela lung tla vangin mi pathum an thi tawh a, mi pariat an hliam tawh. Lirthei ke hnih leh ke li nei chi, a vaiin 16 a delh chhe tawh a, kawngpui âna in a delh chhe nual tawh bawk.