Empowering Mizoram Sports-ah naupang 1,189 an inziak lut tawh

Bána Kaih scheme hnuaia Empowering Mizoram Sports (EMS) kalpui mekah August 18, Thawhlehni tlai khan Chhinga Veng Community Hall-ah Talent Search hun hman a ni a, MLA Jeje Lalpekhlua'n hmanpuiin, EMS-ah naupang 1,189 an inziah luh tawh thu a sawi.

Jeje Lalpekhlua chuan, EMS chu January 14, 2025 khan Chief Minister-in a hawng tih sawiin, "Kum 2036-a Olympic awm turah Mizo infiammite a tam thei ang ber an tel theih nan EMS hian Mizorama naupang infiammi kum 8-15 inkarte chu tun aṭangin sport discipline 24-ah talent search a buatsaih mek a ni," a ti.

EMS atan Bána Kaih scheme aṭangin cheng nuai 500 dah a nih thu sawiin MLA chuan, "Tun dinhmunah EMS hi khaw 41-ah kalpui mek niin, naupang 1,189 an inziak lût tawh a, inziak lût zinga 35.6% chu hmeichhia an ni. Trainer 44 awmin, training programme vawi 76 buatsaih tawh a ni," a ti a; EMS chu Lawngtlai district, Siaha district leh Saitual district-ah pawh kalpui tum a nih thu a sawi.

Jeje Lalpekhlua sawi danin, EMS hi phase wise-a kalpui a ni a, Phase 1-ah Grassroots Coaching & Talent Identification kalpuiin, ni 15 chhung basic training pek an ni. Phase 2-ah hian district leh state level inelna buatsaih ani dawn a, tun kum tawp lamah ṭan hman inbeisei a ni a, inelnaa ti ṭhate chu Phase 3-ah residential coaching leh scholarship nena enkawl zui an ni ang.

Chhinga Venga Talent Seach-ah hian August 18 khan naupang kum 8-15 inkar mi 181 an inziak lut nghal a ni.