Serchhipah National Space Day hmang

Nimin khan Serchhip DC Pisapui Hall-ah India-in thla leilunga Chandrayaan-3 a ṭumtir hriatrengna ní, National Space Day hman a ni a, minister of state Prof. Lalnilawma'n a hmanpui.

National Space Day hmanna hi MIRSAC member secretary F Lalramchuana'n a kaihruai. Prof. Lalnilawma chuan, tunlaiah space science chu ram hmasawnna innghahna pawimawh tak a nih thu sawiin, Mizoram sorkar pawhin ruahmanna a siamna hrang hrangah MIRSAC data a hman ṭangkai thu a sawi.

Prof. Lalnilawma chuan, "India hi space science-a theihna sang tak nei, thlaa satellite ṭumtir thei ram palina kan ni a, thla chhim lam (southern polar region-a) ṭumtir thei hmasa ber kan ni," a ti a; India-in theihna sang tak a neihte chu zir a, Mizoram tana ṭangkai taka hman tum turin Science & Technology mite leh zirlaite a chah.

National Space Day hmannaah hian MIRSAC member secretary ṭhin K Lalrammuana'n khawtlang leh ram tana vansang thiamna (space technology) pawimawhna leh ṭangkaina a sawi a; ISRO scientist-G Dr Renuka Agarwal-i leh NESAC scientist-SF Dr Rocky Pebam te pawhin thu an sawi.

Serchhipa high school zirlaite tan quiz buatsaih a ni a, Marian High School pakhatna niin, Goodwill English Academy leh PCR High School te chu pahnihna leh pathumna an ni. 'Meet the Scientist' tih hun hman niin, zirlaite leh scientist-te inkawmna hun buatsaih a ni a; Audio Visual Show leh Exhibition Display buatsaih a ni bawk.

August 23, 2023 khan India-in thla leilung chhim lama a thlalem a kah chhuah Chandrayaan-3 chu hlawhtling takin a ṭum a, chumi hriat reng nan chuan sorkar laipui chuan August 23 chu National Space Day atan puang a, ISRO bultumin kum 2024 aṭang khan hman ṭhin a ni.