Sericulture-a eizawngtute sorkarin a ngai pawimawh - Sericulture Minister

Nimin khan Central Silk Board leh Sericulture department ṭangkawp chuan Workshop on Mera Resham Mera Abhimaan (MRMA 2.0) chu Sericulture Conference Hall-ah an buatsaih a, khuallian Sericulture minister Lalthansanga chuin sorkarin sericulture-a eizawngtute a ngaih pawimawh thu a sawi.

Sericulture Minister chuan MRMA 2.O neih a nih theihna tura hmala tute hnenah lawmthu sawiin, "MRMA 2.0 hian sericulture-a eizawngtute tan hmasawnna a thlen a, sericulture sector-in a ṭangkaipui ngei ka beisei," a ti a, sericulture-a eizawngtute chu theihtawp chhuah turin a fuih.

Lalthansanga chuan Mizoram sik leh sa chu silk chin nana ṭha tak a nih thu sawiin, "Silk chi li- Mulberry, Tasar, Eri leh Mugga pawh a chin theih. Sericulture-a eizawngtute chu sawrkarin a ngaipawimawh," a ti a, mahni zawnah ṭheuh hmalam pana ke pen turin kalkhawmte chu a chah a ni.

Union Sericulture ministerGiriraj Singh-a nen an inkhawm tawh thu sawiin Sericulture Minister chuan, "Mizoram chu silk siamchhuahna hmunpui ni tura hmalak dan tur kan sawiho. Thenzawl-a P3 Unit (Mugga chi siamna) dinna turin Central Silk Board leh Sericulture dept-in MoU kan ziak," a ti.

Mera Resham Mera Abhimaan-hi India-in zalenna a neih kum 100-na, kum 2047-a khawvela silk thar tam ber ram nih a tumna kawnga hmalakna a ni. MRMA 2.0-in a tum langsar zualte chu ram dang aṭanga silk lak luh tihtlem a, mahni ram chhung ngeia silk thar chhuah leh thawn chhuah tam te; sericulture farmer-te dinhmun siamṭhat a, eizawnna ngelnghet an neih theih nana farmer-te hnena training leh technical support pekte leh a bikin hmeichhiate leh ṭhalaite tana hnathawh tur siamsakte a ni.