Police-in H Lalramdinpuii thattua puh Mualṭhuam North mi pahnih an man

Mizoram Police chuan thuchhuah siamin, H Lalramdinpuii (15) d/o H Lalawmpuia, Mualṭhuam North thattua puh Mualṭhuam North mi pahnih - Denghmingthanga (20) leh Lalneihkima (34) te chu nimin khan police-te'n an man a, jail-ah dah nghal an ni.

Police thuchhuah tarlan danin, Denghmingthanga leh Lalneihkima te hi Police SIT-in vawi eng emaw zat thu an zawtfiah tawh a; nimin khan SIT hmaah inpuangin, H Lalramdinpuii chu an thah a nih thu an puang a, chawhnu dar 1-ah man nghal an ni.

H Lalramdinpuii thah chungchangah Lunglei Police Station-ah thubuai ziah luh a ni tih tarlangin Mizoram Police chuan, "Lunglei Police SIT-te'n a tir aṭangin uluk takin hma lain an chhui zui a ni. Rinhlelh kai thei tur thil awmte chhui chian nan mi hrang hrang koh an ni tawh a, Denghmingthanga leh Lalneihkima te chu vawi tam tak thu zawh fiah turin koh an ni tawh," an ti a; phone an hman dan (digital evidence) leh forensic evidence aṭangin rinhlelhna awmte an chîk chhoh zel thu an tarlang.

Mizoram Police chuan, "H Lalramdinpuii thah a nih chungchanga thil thlen dan kimchang leh finfiahna (evidence) hrang hrangte erawh tun dinhmunah dan kenkawhte leh he thubuai chhui zelna tibuai thei tur a nih avangin la tarlan theih a ni rih lo," an ti.

H Ramdinpuii tualthih­na hi chhui mek a ni a, finfiahnate leh a kaih­hnawih thilte la chhui zui zel a ni tih tarlangin Police chuan, "A ṭul angin thuchhuah siam zel a ni ang," an ti a, hnuchhuitute hmalakna ngaichâng zel tur leh mahni thua hma la mai lo turin mipui an chah.

H Lalramdinpuii hi August 3, 2026 zan dar 8:30 vela an in aṭanga a chhuak chu a bo zui a, khawtlangin an zawn hnuah August 5 chawhma dar 10 velah Mualṭhuam North Middle School hnungah thia hmuh a ni. A ruang endiknaah a áwma chemtea vihna chu a thih chhan ber a ni tih finfiah a ni a, mipat hmeichhiatna lam hawi sûlhnu a taksaah hmuh a ni lo.

(Phek 2-ah zawm a ni)