SIR 2026 electoral roll hearing-ah dilna lut eng emaw zat hnâwl a ni

Mizorama Special Intensive Revision (SIR) 2026 kalpui mekah SIR Draft Electoral Roll-a chuang, nihna chiang lo leh dilna hrang hrangte endikna (hearing)-ah dilna eng emaw zat hnâwl a ni. Hearing hi la neih mek zel a ni a, district ṭhenkhatah chuan zawh a ni tawh.

Serchhip district-ah chuan hearing zawh a ni tawh a, nimin khan electoral roll observer Lalzarmawii hoin bawrhsap chenna inah hearing neih dan thlir let a ni a, district election officer Paul L Khuma, election officer Lalchhanhimi leh ERO leh AERO te an tel.

Serchhip district-ah hian hearing-a inlan ngai - Serchhip bialah mi 2,318, Tuikum bialah mi 2,266 leh Hrangturzo bialah mi 2,470 an awm a, an vaiin mi 7,054 an ni. Form 6 hmanga electoral roll-a thun dil mi 1,238 awmin, chung zinga mi 1,207 chu pawm an ni a, mi 31 hnawl niin, hnawl zinga a tam ber chu ram dang mi leh raltlan an ni.

Form 7 hmanga thi tawh emaw, hming paih ngai emaw dilna 39 a lut a, 37 pawm niin, pahnih hnâwl a ni a; Form 8 hmanga awmna hmun sawn dilna 589 lut zinga 561 pawm niin, 28 hnâwl a ni. Insawn vanga paih ngai (corresponding deletion) mi 362 an awm bawk. Serchhip district-a hearing a zawh hnuah SIR draft electoral roll-ah aiin voter 1,413-in an pung dawn a ni.

Observer Lalzarmawii chuan, Serchhip district-a SIR hearing-a theihtawp chhuahtu ERO/AERO-te inpekna leh thawhrimnate a hriatpui thu a sawi a; DEO, booth level officer leh thawktu dang zawng zawng chungah a lawm thu a sawi bawk.

Lawngtlai district-ah pawh SIR electoral roll hearing zawh a ni tawh. SIR draft electoral roll-ah voter 32,554 chu SIR 2005-a zawmpui nei lo leh chhan hrang hrang vanga enfiah ngai, hearing-a inlan tura koh an ni a; chungte chu Tuichawng bialah mi 15,568, Lawngtlai West-ah mi 10,624 leh Lawngtlai East-ah mi 6,362 an ni. SIR 2005-a zawmpui nei lo paih tâk zat erawh tarlan a ni lo.

Form 6 hmanga electoral roll-a thun dil zingah mi 4,426 pawm an ni a; chungte chu Tuichawng bialah mi 2,296, Lawngtlai West-ah mi 1,344 leh Lawngtlai East-ah mi 786 an ni.

SIR 2026 Final Electoral Roll chu September 7, 2026-ah tihchhuah a ni ang.