UDPA Minister-in Zo Hall a hawng

Urban Development & Poverty Alleviation (UDPA) minister K Sapdanga chuan August 19, Nilaini khan Chaltlangah Aizawl Smart City Ltd. hnuaia sak Zo Hall a hawng. Hall hi Rs 18,92,93,390 sênga sak a ni a, Tourism department kutah hlan a ni.

K Sapdanga chuan, India ramin ram changkangte tih dan zuiin project lian thamte chu sum thawk chhuak thei tura siam a ngai pawimawh thu a sawi a, "Zo Hall hian sum tam tak a thawh chhuah beisei a ni a, mipui tan tourism kaltlanga sum lak luh tihpunna hmanrua leh sorkar hlawhtlinna tehfung pawimawh tak a nih ka beisei," a ti a; Tourism department-chu ṭangkai taka hmang turin duhsakna a hlan.

Tourism minister Lalnghinglova Hmar pawhin thu sawiin, Zo Hall chu Tourism department hnuaia thil chi hrang hrang huaihawt nan a zahpuiawm loh thu a sawi a, "Hmang ṭangkai thei zawk tur anga min ngaih avangin Aizawl Smart City-in kan enkawl turin min pe a, kan lawm hle a ni," a ti.

Zo Hall hi Aizawl Smart City Mission hmalakna a ni a, hawn a nih hnuah Tourism department enkawl turin an hlan. Mi 292 lenna tura siam niin, ṭhutna 281 bakah, mi 11 ṭhut theihna sofa pali dah a ni a; lirthei ke li nei 29 leh ke hnih nei 32 dahna tur parking a awm bawk.

Zo Hall hawnna inkhawm hi UDPA secretary V Lalsangliana’n a kaihruai a, Aizawl Smart City chief executive officer CC Lalchhuangkima'n hall sak dan chanchin a sawi a ni.