KHAWTHLIR

KṬP-te'n thisen pe

Nimin khan KṬP, Chhinga Vengthlang Branch Civil Hospital, Aizawl tan thisen unit 30 an pe a, petute mipa 20 leh hmeichhia 10 an ni a; KṬP, Sakawrtuichhun Bial pawhin Synod Hospital tan thisen unit 21 an pe a, petute mipa 16 leh hmeichhia panga an ni.

Humanitarian Day

Zoram Entu Pawl (ZEP) chuan August 19, Nilaini khan IPR Auditorium-ah World Humanitarian Day an hmang. He hun hi Persons’ with Disabilities commissioner Vanlaldiki Sailo leh Aizawl bishop Most Rev. Stephen Rotluanga, ZEP president ten an hmanpui a, pawl hrang hrang aiawhte an tel. Kumina Day thupui chu, 'Khawvela inpumkhatna tihchak leh mi dangte ṭanpuina kawnga khawtlang hmasawnna ngaih pawimawh bik' tih a ni.

TB do dan sawiho

Serchhip District TB Mukh Bharat Abhiyan leh TB Forum chu nimin khan an ṭhukhawm a, Serchhip bawrhsap Paul L Khuma kaihhruaiin, ngawr (TB) um bona tura hmalakna leh hmachhawpte an sawiho. Tarlan danin, Mizoramah TB vei mi 1,371 awm mekin, chung zinga mi 56 chu Serchhip district-a mi an ni a, Serchhip district-a khua zingah Thenzawlah TB vei an tam ber. Kum 2025 khan Serchhip district-ah TB Free Village 23 an awm a ni.

HIV do dan sawiho

Champhai District AIDS Prevention & Control Committee chuan Champhai additional DC Lalbiakfela kaihhruaiin nimin khan Mobilisation for AIDS Suraksha (MAS) kalpui zel dan tur an rel. Tun hnaia Champhai district-a mi 1,578 thisen endik zingah mi 19-in HIV an vei tih hmuh chhuah a ni a, mi 18-in ART an la tawh tih tarlan a ni.

Science seminar

Champhai District Education Office chuan nimin khan Education training hall-ah Students’ Science Seminar an buatsaih a, DEO K Lalsiamliani'n a kaihruai. High school 12-a zirlaite 'Indian Energy Basket 2027: Prospects & Challenges' tih thupui hmangin an intihsiak a, GM H/S-a pawl 10 zirlai Rinchungnungi pakhatna a ni. Rinchungnungi hi September 2026-a Aizawla state level Student Science Seminar-ah Champhai district aiawhin a tel ang.