Sipai leh an chhungte ngaihsak hi ram pum mawhphurhna a ni - Larsap

Nimin khan Dawrpui Multipurpose Centre-ah Ex-Servicemen Rally hman a ni a; Larsap Gen. Vijay Kumar Singh leh Home minister K Sapdanga ten an hmanpui. Larsap chuan, sipai leh an chhungte ngaihsak chu ram pum mawhphurhna a nih thu a sawi.

Gen. VK Singh chuan, ram leh mipuite himna tura theihtawp chhuah ṭhintu ex-servicemen-te'n ngaihven hlawh lo nia an inhriat loh nan an hamṭhatna ngaihven zui zel a ṭul thu a sawi a, "Sipai chhungte inpekna pawh hmuh hmaih theih a ni lo a, sipai aiin an inpekna a nêp bik lo a, an inghahna bulpui leh a phêna theihtawp chhuahtute an ni. Ramri venghimtu sipai leh an chhungte ngaihsak hi ram pum mawhphurhna a ni," a ti.

A hun tam zawk sipai thuam bela a hman thu sawiin Larsap chuan, "Ex-servicemen leh an chhungte nena hun hmanho hi a nuam tak zet. Mizoram ex-servicemen-te tluka inchei nalh leh felfai India ramah ka la hmu ngai lo, hei hian inthununna ṭha a entir a ni," a ti a; Mizote chu sipai an ṭan lai aṭanga pension hnu pawha entawn tlak tak an nih thu a sawi.

Home minister K Sapdanga pawhin thu sawiin, "Ram tana an hun hlu tak hlantu ex-servicemen-te leh anmahni ṭawiawm tlat ṭhintu an chhungte an chhuanawm tak zet. An service chhungin ramin a mamawh phawt chuan chhuanlam an siam ngai lo a, an pension hnuah pawh inthununna, rinawmna leh inpekna nen khawtlang tan hna an thawk chhunzawm a, khawtlang tana mi hlu an ni," a ti.

Mizo tlawmngaihna leh sipai rawngbawlna chu mi dang dah pawimawh hmasaka innghat tlat a ni tih sawiin K Sapdanga chuan, "Hei vang hian ex-servicemen-te hi tlawmngaihna pho langtu tha berte an ni," a ti a; Mizoramah muanna leh himna a awm zel theih nan mipui leh sipai inkarah inremna leh thawhhona ṭha chhawm nun a pawimawh thu a sawi.

Rally pual hian sipai châwl tawhte leh an chhungte tan Multi Speciality Medical Camp buatsaih a ni a; Larsap chuan ex-servicemen mi hmingṭhate chawimawina a hlan bakah, harsatna vanga ex-servicemen leh an chhung ṭanpui ngaite hnenah chhawmdawlna a hlan a ni.