West Phailengah dinhmun sang zawka sikul 2 hlan kai lawm a ni

West Phailenga Gospel Centenary High School chu sorkar sikulah leh West Phaileng Higher Secondary School chu Lumpsum Special Category II-a hlan kai thar an nihna chu MZP Sub-Headquarters, West Phaileng chuan nimin khan an lawm a; Education minister Dr Vanlalthlana'n hmanpuiin, sikul pahnihte hi a hmunah a fang kual nghal.

Sikul hlan kai lawmna hi West Phaileng Dinthar community hall-ah buatsaih a ni a; Dr Vanlalthlana chuan,

tun hnaiah sawi lâwk loa sikul endik (surprise checking) a kalpui ṭhin thu a sawi a, "Tun hnai thla khat chhungin sikul pariat ka tlawh a, heng sikulahte hian an tih dik lohte hai lansak tura kal ka ni lo a, zirlaite leh zirtirtute fuih tura kal ka ni," a ti.

Education Minister chuan, dinhmun sang zawka sikul hlan kaite chu a lawmpui thu sawiin, "Upgrade an neih theihna tura zirtirtu, khawtlang hruaitute leh nu leh pate ṭan lakna a fakawm hle. Provincialise hnua sikul tlahniam ta an awm ṭhin a, school upgrade takte hi a hma aia an ṭan lehzual a ngai dawn a ni," a ti a; khawtlang hruaitute chu sikul dinhmun hre tura sikula lêng lut fo turin a chah.

Lawmna inkhawm hi West Phaileng MZP Sub-Hqrs vice president Vanlalduha'n a kaihruai a; inkhawm zawhah Gospel Centenary H/S leh West Phaileng HSS dinhmun leh hmasawn theih dan turte sawiho a ni.