MLA-in Ramrikawn - Zihnghalkawn inkar kawng siam mek a endik

Aizawl West-I bialtu MLA TBC Lalven-chhunga, adviser to chief minister chuan nimin khan a bial chhunga Sakawrtuichhun panna kawng, Ramrikawn - Zihnghalkawn inkar siam mek chu a hmunah a endik.

TBC Lalvenchhunga chuan khawtlang hruaitute kâwmin, kawng siam mek leh fûr innangching vanga mipuiin harsatna an tawh mek chu sorkarin a hriatpui thu a sawi a, "Khawtlang mipui mamawh hre reng chungin sorkarin ngawrh takin kawng siamṭhat hna a kalpui zel a ni," a ti.

Ramrikawn - Zihnghalkawn inkar kawng chu thlúr hnih (double lane)-a siam turin Mizorama sorkar hmasa hunah Central Road Fund aṭangin sum hmuh a nih thu sawiin MLA chuan, "Land acquisition (Ram lak) tihfel theih loha a awm reng avangin hun rei tak kawng siamṭhat hi tihpuitlin a ni lo," a ti a; sorkarin nasa taka a bawhzui hnua kawng siamṭhat hna ṭan theih a ni chu lawmawm a tih thu a sawi.

TBC Lalvenchhunga chuan, kawng chhuat (pavement) siamna atan sorkar laipui lamin sum an ruahman (sanction) tel loh avang leh land acquisition tihfel ngai a la awm avangin duh angin kawng siam hna a chak theih loh thu a sawi bawk.

Ramrikawn - Zihnghalkawn kawng siam mekah hian Joint Action Committee on Sakawrtuichhun Road chuan thuneitute hnenah lehkha an thlen tawh thu sawiin Lalvenchhunga chuan, "Khawtlang hruaitute nen kan inbe fo a, line department leh central ministry lamah pavement siamna atan chak taka funding bawhzui mek a ni," a ti.

TBC Lalvenchhunga hi PWD engineer, Aizawl DC aiawh, Land Revenue & Settlement department surveyor-te leh khawtlang hruaitute'n an ṭawiawm a ni.