Media workshop - Varta buatsaih a ni

Press Information Bureau (PIB), Aizawl chuan nimin khan Kolasib-a IPRO conference hall-ah 'Media workshop - Varta' an buatsaih a, district bawrhsap H Dolianbuaia'n a hmanpui.

Varta-ah hian PIB, Aizawl head of office Dr Rajeev Lourembam-a'n inlawmna leh thupui thlirlâwkna a sawi a; Kolasib district MJA member-te, DIET zirlaite leh mi pawimawh dangte an tel. IPRO David A Lalhmingchhuana'n Nasha Mukt Bharat Abhiyan a sawifiah a, Mizoram KVI Board chief executive officer Hnamhlunchhunga'n PM Employment Generation Programme chungchang a sawifiah bawk.

Bawrhsap H Dolianbuaia chuan, India-in ṭhalaite tihchak leh thuam chak a ngaih pawimawh thu sawiin, "Sorkar chuan ṭhalaite chu an theihna hai chhuak a, kawng hrang hranga rintlak leh puitling an nih theih nan training hrang hrang buatsaihsakin, chher hriam a tum a ni," a ti a, sorkar hmalaknate chu hman ṭangkai tum turin ṭhalaite a chah.

Khualzahawm C Zomuanpuia, Kolasib District MJA president pawhin thu sawiin, tunlaiah thu thehdarh a awlsam tawh avangin thu dik lo lêngvâk a tam tawh thu a sawi a, "Thuthang kan dawnte a dik leh dik loh kan chhui chian hmasak zel a ṭul. Information leh media kalhmang dik taka a ṭhan theih nan leh ṭangkai taka hman thiam a nih theih nan inzirtirna lamah ṭan lak a ngai hle a ni," a ti.