Mizorama zirna-inte'n Hindi zirtirtu an mamawh belh dan NLAB-ah thlen

Union Rural Development minister Shivraj Singh Chauhan kaihhruaiin August 19, Nilaini khan New Delhi-ah National Language Advisory Board (NLAB) an ṭhu a; NLAB member Dr Kathy Rohlupuii pawh telin, Mizorama zirna-inte'n Hindi zirtirtu an mamawh belh thu a thlen.

NLAB ṭhutkhawmah hian Dr Kathy Rohlupuii chuan Mizoram CSS/RMSA hnuaiah Hindi zirtirtu la turin a a ngen a; Mizoramin Hindi-a hma a sawn theih nan Hindi subject-a master degree chin chung lam zirlaite hnenah cash award emaw, pawisaa ṭanpuina pek theih dan ngaihtuah ni se a duh thu leh, Mizoramah World Hindi Conference buatsaih a rawt.

Hindi subject-a PhD ti turte tana University Grants Commission-in National Eligibility Test qualified kher a tih chu ennawn a, Mizoram tan bik ngaihhnathiam turin NLAB hotute a ngen bawk.

Dr Kathy Rohlupuii hi Aizawl College-ah assistant professor a ni a, India hmarchhak state aṭanga NLAB member awm chhun a ni. NLAB ṭhutkhawma a thu thlen chungchangah hian Union RD minister Shivraj Singh Chauhan chuan a chhinchiah vek thu leh, Mizorama Hindi hmasawnna tura mamawhte an ngaih pawimawh thu a sawi.