Kut hnathawktute hnenah bungrua hlan

Rural Development & Administration (RDA) minister Prof. Lalnilawma chuan nimin khan Thingsulthliah BDO pisaah PMKSY 2.0 kaltlangin Sesawng leh Thingsulthliah khuaa kut hnathawktute hnenah bungrua chi hrang hrang a hlan.

Prof. Lalnilawma chuan, hmasawnna a taka hmu tur chuan department chauh ni lo, khawtlang leh mi tin ten inlungrualna leh thawhhona ṭha an neih a ṭul thu a sawi a, "Mipuite'n leirem an rah theih nan sorkar chuan hmalakna chi hrang hrang a nei tawh ṭhin a, a nei zel dawn. Sorkar hmalaknate hi mipuite'n a nih dan tur ang takin, rinawm tak leh ṭha taka kan hman chuan hmasawnna hmel thar hi kan hmuh ka beisei," a ti.

Tuihna humhalhah khawtlang inlungrual a ṭul thu sawiin PHE Minister chuan, "Tui pump khawl ṭha tak neih ringawt a tâwk lo a, a pump tur tui thianghlim leh tuihna ṭha kan neih reng a pawimawh," a ti a; thing leh mau, lui leh nungcha te hmangaihna nen humhalh a ṭul thu a sawi.

Minister hian kut hnathawktute hnenah tuizem pariat, electric sewing machine (puanṭhui khawl) pariat, glycel báwm pariat, microwave oven pakhat, brush cutter 10 leh deep freezer pakhat a sem a ni.