VC/LC by-election-ah ZPM che ṭha

August 20, Ningania Mizorama khua leh veng 12-a village council leh local council by-election-a vote tlate chu Ningani tlai khan chhiar nghal a ni a; state sorkara rorel lai ZPM party an che ṭha ber.

By-election neihna khua/veng 12-ah hian VC/LC seat pakhat ṭheuh ruak hnawhkhahna atan inthlan niin, a vaiin seat 12 a ni a; ZPM-in seat pariat an la a, MNF (ṭangrual)-in seat pahnih, INC-in seat pakhat leh independent (ṭangrual)-in seat pakhat an la a ni.

Aizawla Selesih, Durtlang, Dawrpui Vengthar, Bungkawn leh Salem Veng bakah, Lunglei Zotlang, East Lungdar leh Bunghmunah te ZPM candidate an tling a; Aizawla Luangmual leh Zotlangah MNF (ṭangrual) candidate-te tlingin, Bilkhawthlirah Congress an tling. Republic Vengah INC leh MNF candidate inṭâwm (Independent) a tling thung.

By-election hi thihna vang te, LC member ni lai AMC corporator atana thlan tlin an nih tâk vangtea buatsaih a ni.