MizoTaxi vangin permit la pek belh lo; 'Permit pek belh ngai lo se kan duh' - Transport Minister

Transport department chuan MizoTaxi application hman a nih hnuah taxi permit an la pek belh lo. Transport minister Vanlalhlana chuan, taxi permit pek belh ngai lo se an duh thu an sawi.

Vanglaini palai zawhna chhangin Transport minister Vanlalhlana chuan, MizoTaxi app hman ni tawh mah se, Aizawlah taxi permit pek belh a la nih loh thu a sawi a, "MizoTaxi app-a an inziah luh dan kan ngaichâng mek. Permit pek belh ngai lo thei se duhthusam a ni a, mipui mamawh phuhru turin a tam a ngai thung," a ti.

Transport Minister chuan, MizoTaxi app-a inziak lut eng emaw zat an awm thu a sawi rualin, "Mipuiin an an hman duhin an kal duh ṭhin lo. App kan duhna chhan ber chu - mipuiin taxi rate mumal taka an hman theih nan leh rate mumal lo lutuk tihreh nan a ni," a ti a, mipui hmakhua an ngaih vang a nih thu a sawi.

MizoTaxi app hmanga mipuite'n taxi hman tur an duh anga an hmu lo a nih chuan sorkarin ngaihtuahna a sen a ṭul dawn thu sawiin Vanlalhlana chuan, "Mipui kan ngai pawimawh a, mipuiin an tawrh ai chuan taxi hrang hrang permit pek belh a la ṭul maithei. Sorkarin a ṭul angin permit pek belh chungchang a la ngaihtuah zel ang," a ti.

Transport Minister chuan, taxi permit pek belh an châk loh thu sawiin, "Châkin duh ni ila, MizoTaxi app hman hma pawhin a pek theih. Taxi neitute an indîp kan hlau ve tho. Kan sorkar hnuah Aizawl atan two wheeler leh four wheeler taxi permit kan la pe chhuak lo," a ti a; Aizawl pawn atan erawh chuan permit an pek chhuah thu a sawi.