KHAWTHLIR

MLA-in tlawh

Ṭawi bialtu MLA Prof Lalnilawma, minister of state chuan August 20, Ningani khan a bial chhunga Thingsulthliah, Seling leh Tlangnuam khuaa MLA fund aṭanga 'Artuia Intoldelhna tur Bána Kaih Project' kalpuitute a tlawh. Minister hian hmalak dan te, hmasawnna te, mamawhte leh harsatna an tawhte a sawipui a ni.

Heroin man

Champhai police-te chuan August 20, Ningani khan Khankawn Police Check Gate-ah two wheeler taxi MZ-04 A-9788 passenger Hmangaihthangi (45), Chalráng, tuna Chaltlang, Aizawla khawsa mek hnen aṭangin heroin gram 23 an man a; NDPS Act tlawhchhanin thubuai an ziak lut.

Chinfel dan tur rêl

Lawngtlai bawrhsap Donny Lalruatsanga kaihhruaiin nimin khan Lai Autonomous District Coucil leh Chakma Autonomous District Coucil-a reserved forest chhunga land pass awmte chinfel dan tur rêl a ni. DC chuan, reserved forest chhunga land pass awmte chu Supreme Court-in chingfel tura a tih thu sawiin, LADC leh CADC reseved forest-a land pass-te chu chinfel thuai a, state sorkara thehluh tur a nih thu a sawi.

MZU fresher social

Mizoram University Student Council chuan nimin khan MZU Auditorium-ah zirlai lut tharte lawmna inkhawm an buatsaih a, MZU vice chancellor mawhphurhna la mektu Prof. Zokaitluangi'n a hmanpui. Prof. Zokaitluangi chuan, zirlai lut tharte chu MZU rules zâwm ṭha tur te, ṭha taka class kal tur te, a tir aanga ṭang mar tur te, ruihhlo laka fihlim tur te, mi dangte zah thiam tur te, sum leh pai an neih angte renchem tur leh, hriselna ngai pawimawh turtein a fuih.

Dan loa pension lak tihtawp hrilhfiah

Treasury, Aizawl North leh South chuan nimin khan Darlawn BDO conference hall-ah dan loa pension/family pension lâk tihtawp tura sorkar hmalakna inhrilhfiahna an buatsaih a; pensioner te, Darlawn BDO hnuaia khua leh veng tina VC, YMA leh kohhran bial hruaitute, DDO-te leh registrar of births & deaths aiawh an tel.