Zirlaipui tiduhdahtute chungthu ngaihtuah

Mizoram State Commission for Protection of Child Rights (MSCPCR) chuan, tun hnaia sikul pakhata mahni zirlaipui tihduhdahtute chu an chungthu ngaihtuah a nih thu an tarlang.

MSCPCR chuan, tun hnaia sikul pakhata zirlaite'n an zirlaipui an tihduhdah chungchang chu ngun takin an vil zui tih sawiin, "Aizawl District Child Protection Unit, police-te leh thil thlenna School Managing Board hmalakna fakawm kan ti hle. Mahni zirlaipui tiduhdahtu mi pali zinga kumtlinglo pathum leh kumtling tawh pakhat te chu dan angin an chungthu ngaihtuah a ni," an ti.

Mualṭhuam North tleirawl H Lalramdinpuii tualthihna chungchangah MSCPCR chuan, mawhphurtua ngaih Denghmingliana leh Lalneihkima te police-te'n an man chhuak chu lawmawm a tih thu leh, an phu tâwka hrem an nih ngei theih nan an en zui dawn thu an tarlang.

MSCPCR chuan, June 7, 2026 zana Aizawl Observation Home, Durtlang aṭanga naupang tlan chhuakte chungchang tarlangin, "Mizoram Police leh Observation Home-a thawkte hmalakna zarah June 18 khan Kolkata aṭangin Mizoramah hruai haw an ni a, June 19 khan Observation Home-ah dah leh an ni," an ti.

MSCPCR chuan, dânin naupangte dikna leh chanvo (right) a humhalh rualin, dân loa chê naupangte chungah dân anga hmalak ṭhin a nih thu an sawi a, "Naupangte hian dikna leh chanvo an neih rualin, mawhphurhna pawh an nei ve a ni tih an hriat kan duh hle a ni," an ti bawk.