Mualṭhuam North VC & NGO-in tualthattute chhungkua rîkrâp zawnga che lo turin ngen

Mualṭhuam North Village Council leh NGO-te chuan thuchhuah siamin, an khaw mi H Lalramdinpuii (15) s/o H Lalawmpuia thatttu man chhuak tura hma latute chunga an lawm thu an tarlang a, tualthattute chhungkua rîkrâp zawnga che lo turin mi tin an ngen.

Mualṭhuam North VC leh NGO-te chuan, H Lalramdinpuii thattute Denghmingthanga (20) s/o TC Lalramdina leh Lalneihkima (34) h/o Rosangliani te man chhuah an ni chu an lawm thu tarlangin, "Râwng taka tualthattute kan dem tak zet a ni. Naupang pawisawi lo râwng taka thattu kan tualchhunga an awm hi a pawi kan tiin zahthlak kan ti hle," an ti.

Tualthattu chhuitu Mizoram Police, a bikin Lunglei Police Special Investigation Team (SIT) leh Forensic Science Laboratory te thawhrimna leh inpeknaah an lawm thu sawiin, "Hmalakna chak taka a kal theihna tura thlâwp tlattu sorkar chungah pawh lawmthu kan sawi," an ti a; hnu chhuinaa khawtlang mipui inpekna leh police-te ṭha taka an thawhpuinaah an lawm thu an tarlang.

Mualṭhuam North VC & NGO chuan, an khaw mipui dem zawng leh police thawhpui ṭha lo anga social media-a pho chhuak duh an awm chu pawi an tih thu tarlangin, "Pawikhawihtu zawn chhuah a nih thuai theihna tura khawtlang mipuite'n police-te theih ang tâwka kan puihzia chu police-te hi a hre chiangtu an nih kan ring. He tualthihnaa pawikhawihtute hi an phu ang hremna na thei ang ber pek se tih hi kan duh dan a ni," an ti.

Tualthattu hriat a nih hnuah khawtlang hruaitute ngenna zah thiama tun thlenga boruak ṭha lo an nei lo chu lawmawm an tih thu sawiin VC leh NGO chuan, "Pawikhawihtute man an nih takah chuan an phu tâwka hrem an ni ngei dawn. Tualthattute chhungkaw chungah a pâwngpawrh zawng leh an chhungkua rîkrâp zawnga khawsa lo turin kan inngen a ni," an ti. An khawthlang chhiattawhna khawngaiha lainattu zawng zawng chungah an lawm thu an tarlang bawk.