Chakma páwl hmalakna hrethiam lo

ZO Reunification Organisation (ZORO) chuan, India rama Chakma pawl hruaitute'n Bangladesh-a Chittagong Hill Tracts chu India rama behtir tumin hma an la nia sawiin, an hriatthiam loh thu an tarlang.

Nimina ZORO thuchhuah tarlan danin, India rama Chakma hnam hruaitute'n Chittagong Hill Tracts chu India rama behtir an duh thu leh International Court of Justice-ah thlen an tum thu tun hnaiah an sawi a; Chittagong chu August 17, 1947-ah Pakistan-a behtir a nih thu leh, August 17 chu Chakma Black Day a nih thu an sawi a ni.

ZORO chuan, "Chakma-te'n intineitu taka an ram ang maia Chittagong Hill Tracts an sawi ta mai hi kan hrethiam lo hle. Chittagong Hill Tracts hi a ram neitu leh a luah hmasa bertute chu Zo fate kan ni. Chittagong Hill Tracts-a British sorkarin bu a khuar hma zawng khan zalen ram niin, tu thuhnuaiah mah awm loin, anmahniin roreltu lal neiin an lo awm tawh. Chakma-te chu tlai khawhnua pêm lut ve chauh an ni. Chittagong Hill Tracts hi pi leh pu aṭanga Zo fate ram a ni," an ti.