Tun atan chuan TBCC tel lo hian kan khawsa thei lo - Lalduhoma

August 22, Inrinni tlai khan chief minister Lalduhoma chuan Ṭawngṭai Bethel Camping Centre (TBCC), Sakawr-tuichhuna Banakaih (Handholding) Scheme hmanga camping centre sak (Jesaia room), camper mi 80 aṭanga 90 leng chu a hawng a, "Tun atan chuan TBCC tel lo hian kan khawsa thei lo a ni," a ti.

Chief Minister chuan 2023-a CM atana lakluh a niha a tlawh hmasak ber chu TBCC a nih thu sawiin, "A hnuah pawh ka tlawh leh a, vawiin hi ka vawi thum tlawhna a ni. Tunah chuan in lo changtlung ta hle a, inthiarna leh kawt zawl tha tak in nei a, choka in nei hrang vek bawk," a ti a, hmasawnnate hmuh nuam a tih thu a sawi.

Sorkar pawhin sum a neih ang angin ruihhlo ngaite chhawmdawl hna an thawk tih sawiin Lalduhoma chuan, "TBCC ngei pawh hei kan hmuh angin Mosia room kan sa tawh a, tunah Jesaia room kan hawng leh ta. Heng kan hmalaknaah hian Central YMA-ten min thawhpui ṭha ṭhin a, kan lawm hle a ni," a ti.

Chief Minister chuan TBCC-ah mi 805 an awm mek tih sawiin, "Thawktu tlemtein fel taka inenkawl zo thei hi a ropui ka ti. In inpekna thukzia a lang a ni. TBCC vawi hnih lai a function loh ṭum khan Aizawl khawpui tan a buaithlak hle a, tun atan chuan TBCC tel lo hian kan khawsa thei lo a ni," a ti a, TBCC a thawktute chungah lawmthu a sawi.

CM Duhoma chuan lung-in tang 98% chu drugs leh a kaihhnawih avanga tang an nih thu sawiin, "A tam zawk hi drugs zawrh vanga tang an ni ber. Chutiang dinhmuna kan din avangin ruihhlo avanga hliam tuarte chhawmdawl kan ngaihpawimawh a, Hulhliap Short Stay Centre-te kan din. Mi 192-te hnenah skilled training neih tirin, mi 21 hnenah Banakaih Scheme kaltlangin eizawnna bulṭanna kan pe hial," a ti.

Eizawnna mumal neih loh chuan tlukna ngaiah an tlu nawn fo ṭhin tih hre reng chungin sorkar chuan ruihhlo ngai enkawlna dawng chhuak tawhte an thiam zawng thilah (skill) training pein, Banakaih Scheme hnuaiah an dam khawchhuahna atan ṭan a la tih sawiin CM chuan, "Ngawlvei sim tawh, jail tang chhuakte pawh training pek zel hi ṭha ka ti," a ti a, kohhran, khawtlang leh NGO hrang hrangte thawkko zelin chhunzawm zel dan an dap dawn thu a sawi.

Thusawitu dang Central YMA president R Lalngheta chuan, camper-te chu TBCC atang hlawhtling taka an chhuah hnuah an veng YMA-te'n an lo lawm dawn tih hrilhin, kawng hlui zawh tawh loa, nunna thar nena chhuahsan ngei turin a chah a ni.

TBCC dintu TT Zohmingthanga pawhin thu sawiin, Chief Minister-in TBCC a ngaipawimawh ṭhin avangin lawmthu a sawi a, "Tun hnaiah pindan thar pahnih sorkar ṭanpuinain kan han nei thar a, damlo tam zawk kan enkawl theih phah dawn," a ti a, chhungkaw tam tak tan malsawmna a nih dawn thu a sawi.

Jesaia room hi June 23, 2026-ah sak ṭan niin, August 15 khan sak zawh a ni a, cheng nuai 14.58 sen a ni. A sakna sum hi sorkarin a tum a, a sak hna hi CYMA-in a buaipui a, camper-te'n tha an thawh ṭhin.