Mizoramah khualzinte tana tlawh manhla ṭhahnem tak a awm - Tourism Minister

Tourism minister Lalnghinglova Hmar chuan August 21, 2026 khan Berawtlang Multipurpose Hall-ah ‘Development of Beraw Tourist Resort’ project hnuaia khualbuk sak thar a hawng. Tourism Minister chuan, Mizoramah hnam dang khualzinte tana tlawh manhla tak tak tur ṭhahnem tak a awm tih a sawi.

Lalnghinglova Hmar chuan, Mizorama khualzinte thlenna tur khualbûk thar changtlung tak hawn theiha peih a ni ta chu a lawm thu a sawi a, "Mizoramah chuan hnam dang khualzinte tana tlawh manhla tak tak tur ṭhahnem tak a awm a, tun hnaiah Mizoramah tourist an pung nasa a, tourism sector chu Mizoram tan sum hai luhna hnar tha tak a ni chho mek. Khualbuk hawn thar hi tourism sector tana hmasawnna a nih ngei ka beisei," a ti.

Kum 2024-25 aiin 2025-26 chhung khan Mizoram chuan tlawhtu khualzin 4,00,000 chuangin an pung tih sawiin Minister chuan, "Ram pawn aṭanga lo kal pawh kum hmasa aiin 9,000 chuangin an pung. Tourism sector chu mi tam tak tan eizawnna siamsak theitu a nih avangin sorkar leh mipui ṭanrual a ngai a, khawtlang hruaitute nen pawh inhrethiam taka thawhho a ṭul a ni," a ti a; a hlawkna tak tak hmutu tur chu Mizoram mipui an nih avangin ram hmasawnna tura theihtawp chhuahpui zel turin kalkhawmte a fuih.

Development of Beraw Tourist Resort project atan hian cheng nuai 606 sen a ni a; khualzinte thlenna tur khualbûk panga hawn thar niin, bedroom pahnih ṭheuh a awm a, a bang atan hmun hrang hrang aṭanga lakkhawm lung ṭha bik hman niin, a chhung pawh khualzinte tana nuam thei ang ber tura chei a ni.

Hawnna inkhawm hi Mizoram Tourism Development Authority (MTDA) chief executive officer R Lalrodingi'n a kaihruai a; Tourism department hruaitute leh tlawmngai pawl hrang hrang aiawhte an tel.