Vanduaina vangin hmun thumah mi pathum an thi

August 21, 22 leh 23 khan Mizoram hmun hrang hrangah vanduaina avangin mi pathum an thi.

Laldinliana (40), Champhai Vengsang chu August 21, 2026 zan dar 10 vel khan Champhai Electric Vengah thi-a chhar a ni.

Thu dawn danin, Laldinsanga thi-a hmuh a nih hian a bawkkhup zawngin a lo awm a; a luah a hliam bakah, a kut a tliaka sawi a ni. Step-ah a lum a nih rin a ni. A tirah tu nge a nih hriat a ni mai lo a, Champhai District Hospital mitthi dahnaa dah a nih hnuah, August 22 zing dar 9 vel khan Laldinliana a ni tih an hria.

Laldinliana hi police-te'n an buaipui nghal a, Inrinni khan a taksa endik (postmortem) a ni a, nimin khan vui a ni.

Zoramthara (30) chu khuavâng rúlin a chuk avangin nimin zing dar 8 vel khan Civil Hospital, Aizawlah a thi.

Thu dawn danin, Zoramthara hi Suangpuilawnah an ṭhianpa nen bike-in an kal a, an haw lam chu rúl hi bike-in a chíl a, rúl sa damdawi atan a ṭha tia an sawi ṭhin chu hriain, rúl chu a tan a ni. A khawih vel laiin rúl lu lam chalchâng tâl vel chuan a kutah a chuk.

Zoramthara hian a tirah chuan harsarna a nei lo a, mahse, zan lai pelh hnuah harsatna a nei ṭan a, zing dar 3 velah Suangpuilawn Damdawi-In (PHC) panpui a ni. An refer angin Civil Hospital, Aizawl panpui leh a ni a, zing dar 8 vel khan a thi.

August 22, Inrinni zing dar 6:20 khan Lalremruata (16) s/o Lalremchhuanga (L), Khatla South chu electric current man vangin a thi.

Thudawn danin, Lalrem­ruata hi Tuikhuah­tlang Basketball Court-ah an inkhel a, ball liam a chhar chu 11Kv line tawk palhin a lo man. Electric current-in a manna hmunah a thi nghal. Lalremruata hi chhun dar 1 ah vuiliam a ni.