Kum 2027 aṭangin PPP mode kalpui tum

Mizoram Education Reforms Committee (MERC) chu Education minister Dr Vanlalthlana kaihhruaiin August 21, 2026 khan an ṭhukhawm a; kum 2027 academic session ṭan hunah Public Private Partnership (PPP) mode-a kalpui tur sikulten hna an ṭan ve theih nan February, 2027-ah sikul inhlan felna (hand over to partner) neih an rel.

Ṭhutkhawmah hian Mizorama zirna siamṭhatna tura hmachhawp hrang hrang kalpui dan tur an rel a ni a; sorkar leh kohhran thawhhona aṭanga sikul enkawl dan tur PPP mode atana rawtna an pawm tawh tihhlawhtlin dan tur leh ruahmanna (implementation schedule) an duang.

September - November, 2026 chhung hian sorkarin a tih tur hrang hrangte tiin, kumin December-ah chuan sikul thlang fela inremna, memorundum of understanding (MoU) tih fel tum ni se, kum 2027 academic session ṭan hunah PPP mode-a kalpui tur sikulten hna an ṭan ve theih nan February, 2027-ah sikul inhlan felna (hand over to partner) neih ni se, an ti.

Draft Mizoram Education (Transfer and Posting of School Teachers ) Rules, 2026 chu hman theih tura pawm ni tawh mah se, MERC chuan siamṭhat ngai nia langte an siamṭha a; sorkara theh luh hmain Service Association-te leh helam kaihhnawih pawl hrang hrangte ngaihdan leh thlir dante enho leh ni se, an ti. Hemi zawhah chuan sorkarin dan ang taka kalpui turin thil ṭulte a buatsaih ang a, hun remchang hmasa berah Cabinet meeting agenda turin ruahman a ni ang.