KHAWTHLIR

Kohhran ṭhalaite'n thisen an pe

August 22, Inrinni khan kohhran ṭhalai pawl hrang hrangin thisen an pe. Salvation Army Youth Central South Division-te'n ZMCH tan unit 52 pein, petute mipa 37 leh hmeichhia 15 an ni a, Adventist Youth Federation Aizawl West Circle-te'n Synod Hospital tan unit 43 pein, petute mipa 36 leh hmeichhia pasarih an ni. Civil Hospital, Aizawl tan KṬP, Upper Republic Branch-in unit 34 pein, petute mipa 30 leh hmeichhia pali an ni a, KṬP, Lunglei Venglai Bialin Lunglei Civil Hospital tan unit 31 pein, petute mipa 26 leh hmeichhia panga an ni.

Paddy cum Fish cultivation

Serchhip Agro Farmers Producer Society Ltd. member-te chuan August 21, 2026 khan Serchhip Zawlpuia an leilet bialah a ruala buh leh sangha thar chhuah kawp theihna 'Paddy cum Fish Cultivation' atan sangha no chhuah runpui an hmang a; district fisheries development officer Lalmalsawma leh APRINS managing director Chandon Bhothakur-ten an hmanpui.

Leivung paih

Hnahthial district bawrhsap K Vanlalruati chuan thupek tichhuakin, Hnahthial district-ah inhmun lai leh leivung paih turte chu duh duhna hmunah paih phal a nih loh thu a hriattir a; "A paihna tura ruat bikahte chauh paih tur a ni a, he thupek zawm lo chu BNS, 2023 Section 223 hmangin hrem theih a ni," a ti.

Heroin leh crystal meth an man

August 22, 2026 khan Central YMA hnuaia Central Anti Drug Squad (CADS) leh Excise & Narcotics department ṭangkawp chuan heroin leh methamphetamine an man. CADS leh Excise hian Mizoram Police-te puihnain crystal meth gram 649 manin, a kaihhnawihah hian JH Vanramnghaka (38) s/o Lallarthanga (L) leh Lalrinawmi (37) d/o Vallianmawia, Zokhawthar a cheng ve ve nia insawite chu an man nghal. Kolasib Diakkawnah Lalnunngili (34) d/o Dempuia (L) leh Lallianchama (28) s/o Remtluanga (L), Kolasib Venglai East nia inchhalte hnenh aṭangin heroin hawng khat leh Bagha Cap 18 an man bawk.