MPSC Reform Committee ring ngam turin Chief Secretary-in MZP hruaitute a hrilh

MZP hruaitute chuan August 21, Zirtawpni tlai khan chief secretary Khilli Ram Meena chu a pisaah an kawm. CS chuan MZP hruaitute chu MPSC Reform Committee ring ngam turin a lo hrilh.

MZP hruaitute chuan, tun hnaia MPSC siamṭhat hnatlang an koh chhan leh koh a nih dan te, ṭhalai hnazawng mekten harsatna an neih hrang hrang bakah MPSC-a an ngaihmawh hrang hrangte Chief Secretary hnenah hian an thlen a ni.

Chief Secretary chuan MZP leh ṭhalai hnazawngten an beiseina neih dan chu sorkarin a hria tih sawiin, "In thil phut hrang hrangte tihawm tak a ni. Chuvangin, MPSC Reform Committee pawh din a ni. Hemi chungchangah hian Chief Minister ka hmu a, ani pawhin a lo ngai pawimawh," a ti.

MPSC Reform Committee chu sorkar officer senior leh tawn hriat ngah tawh tak tak vek leh department hrang hrang aiawh an nih thu sawiin Chief Secretary chuan, MZP hruaitute chu committee hi ringngam turin a chah.

Chief Secretary chuan Reform Committee-in a MPSC leh a kaihhnawih pawl hrang hrang zirlai pawlte pawh tiamin an rawn tur thu leh rawtna leh siamṭhat ngai neite tan duh dan thlen theihna reng a nih tur thu a sawi.

MZP hruaitute chuan MZP leh aspirant-te pawhin rawtna an thlen tur thu Chief Secretary hi an hrilh a, MPSC siamṭhat duhtute chuan rawtna an neih ang angte thlen ngei turin an sawm nghal.

MZP hruaitute chuan, central agencies hrang - Enforcement Directorate (ED), National Investigation Agency (NIA), Income Tax-ten a Mizoram sorkar leh police-te hriatpuina tel loa Mizo mipui ti thlabar zawnga harsatna an siamsak ṭhin chungchang pawh CS hi an sawipui.

Dan anga hmalakna chu an thlawp tlat thu sawiin MZP hruaitute chuan, "Chutih ruala mipui leh sumdawng ṭhenkhatte tana harsatna an siam ṭhin hi pawi kan ti hle. Hetiang thil hi thleng nawn tawh lo turin kan duh. Heng hmalaknate hi kan ram leh hnam tan a him tawk loin kan hria," an ti a, a ṭul ang a hmala turin CS hi an ngen nghal.

Chief Secretary chuan, thuneitu leh heng agency thuneitute hnenah thlen a, a ṭul ang a hma a lak tur thu MZP hruaitute hi a hrilh.