Inspection Team-in kawng thawmṭhat an endik; Ni tin en zui zel turin contractor an chah

Serchhip district additional DC Dorothy Muansangi kaihhruaiin August 21, 2026 khan National Highway-02 Inspection Team chuan Keiṭum - Khumtung inkar kawng chhia thawmṭhat mek an endik a; kawng an thawm tawhte pawh nitin en zui zel turin contractor an chah.

Inspection Team chuan NHIDCL hotute leh an hnuaia contractor (KRAM Infracon Pvt. Ltd., Shivalaya Construction Ltd. leh Bhartia Infra Projects Ltd.)-te chu Serchhip district-in kawngpui ṭha leh tlo a neih theih nan District Administration level aṭangin an vil reng dawn tih an hrilh a; MJA leh khawtlang hruaitute nen ṭangkawpin national highway inspection hi an kalpui zel dawn thu leh kawng an thawm tawhte pawh ni tin en zui (daily maintenance) zel turin contractor-te an chah nghal a ni.

Dorothy Muansangi chuan, tun dinhmunah ruahtui tlak lai a nih avangin kawng blacktop hna chu thawh tak tak theih a nih rih loh thu a sawi a, "Kawng khuar chhe zual, lirthei tana tlan hrehawm tur hnawh rih mai a ni a, fur ruahtui tla a reh fel veleh September thla chawhnu lam aṭangin Serchhip district chhunga NH-02 chhia zawng zawngte hi NHIDCL hnuaia contractor-te hi blacktopping ṭha taka tih tir leh vek kan tum," a ti a; hmanraw ṭha lo hman an tum em tihte lo enpuia, a ṭha lo leh mit tlung lote chu thuneitute hnenah hriattir zel tur leh chumi atan chuan 'Vantlang Viltu App' hmang ṭangkai turin mipui a sawm bawk.

Tarlan danin, August 22, Inrinni aṭang khan NH-02 (Serchhip By Pass Road) Kikawn - Sailiamkawn inkar kawng chhia thawmṭhat hna thawh ṭan nghal a ni dawn a, ni sarih chhungin contractor (Kram Infracon Pvt.Ltd.) ten a khuar chhe zualpui hnawh zawh hman an tum dawn a ni.