KHAWTHLIR

Observer-in tlawh

Mamit district Electoral Roll observer Dr Lalrozama chuan nimin khan Mamit tlawhin, DC conference hall-ah Mamit district-a SIR 2026 hearing kalpui mek thlirhona a neihpui a, harsatna leh hmachhawpte an sawiho nghal. Dr Lalrozama chuan Mamit district a SIR hearing hlawhtling taka kalpui zel a ni chu lawmawm a tih thu sawiin, election official-te leh NGO, political party leh khawtlang hruaitute thawhhona a ṭhat vang a nih thu a sawi.

AR-in cigarette man

Assam Rifles chuan August 22, Inrinni khan Seling huam chhunga operation an neihnaah foreign cigarette case 15, cheng nuai 36 hua chhut chu TATA sumo pakhat aṭangin an man. Cigarette leh lirthei khalhtu chu Custom Preventive Force, Seling hnenah chhuizui turin an hlan.

Project Genesis

Lawngtlai DC Donny Lalruatsanga kaihhruaiin nimin khan a pisaah sorkar hotuten 'Beti Bachao Beti Padhao (BBBP)' hnuaia 'Project Genesis' kalpui dan tur an rel. Project Genesis hi Lawngtlai district-a khaw thlan bik 23-ah kalpui a ni dawn a; Donny Lalruatsanga chuan, Project Genesis chu naupaiten Antenatal Care lak ṭhat leh nau neih theihna damdawi-in ngeia nau an neih nana hmalakna a nih thu a sawi.

Ṭamdil enkawl dan tur rel

Saitual additional DC Lallawmawma kaihhruaiin nimin khan Ṭamdil Management Committee an ṭhukhawm a; Ṭamdil Management Committee member secretary chu Fisheries department aṭangin Tourism department-ah thlak ni se, member atan Tualbung khaw aiawh telh ni se, an ti.

Silai an man

August 23, Pathianni zing khan Thingsai Police, 14th Assam Rifles leh New Ngharchhip YMA ṭangho chuan Myanmar luhna Lungdap kai leh New Ngharchhip inkarah Myanmar aṭanga dan phal loha lakluh AK 47 Rifle pathum, magazine pali leh silai mu 7.62 mm pakua an man. Silai leh a mu neitu Darunga (43) s/o Lusei Kumar, Zawlpui, Lunglei district nia inchhal leh a phurhna Kenbo bike (125) pahnih leh mobile phone pahnih an man tel.