Pathiannia lirthei dan bawhchhia zingah helmet khum loa lirthei khalh an tam ber

Aizawl Traffic Police chuan August 23, Pathianni chawhnu khan Aizawl khawpui hmun hrang hrangah lirthei dan bawhchhia an awm leh awm loh endikin Special Drive an nei a; dan bawhchhia mi 259 an man. Pathiannia lirthei dan bawhchhia an man zingah helmet khum loa two wheeler khalh an tam ber.

Traffic Police hotute hnen aṭanga thudawn danin, August 23, Pathianni chawhnu khan dan bawhchhiatna leh lirtheia chetsualna thleng ṭhin tihtlem a nih theih nan Aizawl khawpuia hmun hrang hrang 44-ah Special Drive an nei a, dan bawhchhiatna hrang hrang avangin mi 259 an man a; lirthei khalhtu/neitute chu dan zawm kawngah ṭan la thar zel turin an ngen.

Inthlahdah leh dan pawisak lohna avanga dan bawhchhia man ngai an la awm zel chu pawi an tih thu tarlangin Aizawl Traffic Police chuan, "Kan lirthei kan hman dan leh enkawl danah ṭan la thar zel turin kan inchah a, Aizawl khawpui a lo him a, thlamuang taka kan kawngpuite mi tinin kan hman tlân theih nan Special Drive hi a ṭul anga kalpui zel a ni ang," an ti.

Pathianni chawhnu lama Special Drive-a lirthei dan bawhchhia 259 an man zinga 148 chu helmet khum loa two wheeler khalh niin an tam ber a, driving license nei loa lirthei khalh 39-in an dawt. Rear view mirror/side glass awm lo 13, two wheeler-a phalchin aia tam inphur 10, tlan phal loh zawng (wrong side)-a lirthei khalh 10, lirthei khalh laia meizial zu pariat, kum tling lo lirthei khalh pasarih, lirthei ri bengchheng vuah pathum bakah, helmet dik lo khum te, bull bar vuah, mud-guard vuah lo, Traffic duty thupek zawm duh lo leh duhdah taka lirthei number ziak eng emaw zat an man bawk a ni.