Kolasib dist-ah thla 3 chhungin HIV kai hmuh chhuah thar 31

Kolasib district bawrhsap H Dolianbuaia kaihhruaiin nimin khan District AIDS Prevention & Control Committee an ṭhukhawm a; thla thum chhungin HIV kai hmuh chhuah thar 31 an awm thu leh mipat hmeichhiatna aṭanga kai 19 an nih thu tarlan a ni.

Ṭhutkhawmah hian HIV/AIDS darh zel tur ven nana hmalak dan tur leh '3rd Phase Intensified IEC Campaign' kalpui dan turte rel a ni a; Kolasib district chhunga khaw 25 - Kawnpui (VC 1, 2, 3, 4, 5), Lungdai, Tuiṭhaveng, Khamrang, Zanlawn, Hortoki Vengchhak, Hortoki Venglai, Thingdawl (VC 1, 2), Bilkhawthlir North, Bilkhawthlir South, Bairabi South, Bairabi North, Meidum, Bualpui, Saipum, Saiphai, Bukvannei, Buhchang, Phainuam leh Rengtekawnahte HIV/AIDS awareness campaign neih an rel.

Heng khaw 25 thlan chhuahahte hian Mobile ICTC, LWS leh Bike Outreach Worker-te ṭangkawpin sikul 39 leh college pahnihah HIV leh ruihhlo (drug) laka fihlim tura inzirtirna neih a ni ang.

Tarlan danin, Kolasib district-ah June - August, 2026 kal mek chhung hian mipui nawlpui leh naupai thisen endik 2,818 aṭangin HIV kai 31 hmuh chhuah thar a ni a; heng zinga pathum hi naupai an ni. HIV kaina chhan langsar ber chu mipat hmeichhiatna niin, mi 19-in an kai a, mipat hmeichhiatna aṭanga kai zingah hian kawppui nghet ni lo (non-commercial/non-regular partner) aṭanga kai mi 13 leh kawppui nghet (regular partner)/nupa tuak aṭanga kai mi panga an awm.

Hriau/syringe thianghlim lo hman nawn (infected needle & syringe) aṭanga kai mi pariat leh nu aṭanga nautea kai (parent to child) pakhat a awm a bawk.