Excise Minister hoin ruihhlo do sawiho

Nimin Excise and Narcotics minister Lalnghinglova Hmar, Aizawl West-II bialtu MLA hoin Aizawl West II Assembly Constituency Ruihhlo Do meeting chu Cultural Centre cum Auditorium, Vaivakawnah neih a ni a, ward no XII corporator C Vanlalhruaii, ward no XIII corporator Vanlalhruaia leh Aizawl West II huam chhunga local council NGO leh kohhran aiawhte an tel a ni.

Excise Minister chuan thu sawiin, "Ruihhlo do hlawhtling tur chuan sorkar tha chakna chauha innghah theih a nih loh avangin kohhran te, tlawmngai pawlte leh khawtlang hruaitute chu thawhpuiah ka sawm nawn a ni. Ruihhlo la tichhin loten an tihchhin loh nan nasa lehzuala inzirtirna kalpui a ṭul," a ti a, ruihhlo che vel khuahkhirh tura sorkar leh mipuite thawhhona a fak.

Ṭhalaiten ruihhlo an khawih ṭanna chu pawi tham ni loa kan ngaihte a ni fo tih sawiin Lalnghinglova Hmar chuan, nu leh pa te, an chenpuite leh zirtirtute chu an naute ngaihven reng turin a chah a, "Ruihhlo ngawl vei mekte enkawlna kawngah pawh ṭan lak a ṭul. Ruihhlo do turin kan la tlai chhe lo a, kan zavaia theihtawp kan chhuah phawt chuan danglamna lian tak kan thlen thei a ni," a ti.

Ṭhutkhawm hi Excise commissioner Z Lalhmangaiha'n kaihruaiin, Excise joint commissioner Peter Zohmingthanga'n Mizorama ruihhlo din-hmun tlangpui a lem nen a sawifiah a, zawhna leh chhanna hun leh sawihona hun hman a ni bawk.