Lungleiah School Drug Policy sawiho

Lunglei district bawrhsap Navneet Mann kaihhruaiin nimin khan DC conference hall-ah School Education department-in zirna-in hrang hranga ruihhlo dona kawnga hmalak dan tur inkaihhruaina a duan 'The Mizoram State School Drug Policy, 2026 (Draft)' sawihona neih a ni a; sorkar hotute, sikul, zirtirtu leh zirlai pawl te, Local Council Association, tlawmngai pawl leh MJA aiawhte an tel.

Navneet Mann chuan, ruihhlo chu mihring hriselna tichhetu leh nunphung tibuaitu a nih avangin do a ṭul thu a sawi a, "Nasha Mukt Bharat Abhiyan (NMBA), NCORD leh hmalakna hrang hrang kaltlangin ṭhalaite zingah leh zirna-inahte ruihhlo dona kawnga hmalakna engemawzat kalpui mek a ni a, School Drug Policy ṭha tak a awm tur hi a lawmawm takzet. Nu leh pate leh zirtirtute chu zirlaite entawn tlaka ruihhlo laka an fihlim a pawimawh a ni," a ti a; zirtirtu ruihhlo laka fihlim lo an awm chuan khauh taka hmalak zel a nih tur thu a sawi.

Sawihonaah hian ruihhlo laka zirlaite an him theihna tura rilru put hmang dik leh rilru hrisel an neih theih nana moral education leh mental health lam inzirtir tam pawimawhna te, infiamna leh co-curricular activity pawimawhna te, nu leh pate leh khawtlangin zirna leh zirlaite an vei a, neitu nihna rilru pu chunga sikul an ngaihven a ṭul thu te leh ruihhlo dona kawngah department hrang hrang, pawl hrang hrang, zirtirtu, nu leh pa leh khawtlang mipui ṭanrual leh thawhho a pawimawh thute an sawi a ni.