Covid-19 vaccine pek ṭan a ni I ring ngam phawt ang u - Health Minister

January 16, Inrinni khan India ram pumah Covid-19 laka invènna damdawi (vaccine) Covishield pek chhuah ṭan a ni a, Mizoramah pawh hmun pangaah pek ṭan nghal a ni. Vaccine pek chhuah tur puala inkhawm Civil Hospital, Aizawl auditorium-a buatsaihah Health minister Dr R Lalthangliana chuan, Covid-19 vaccine chu ring ngam phawt turin mipui a chah.

Vaccine pek ṭan ní hian Aizawl Civil Hospital, Lunglei Civil Hospital, Zoram Medical College, Kulikawn Sub-District Hospital leh ITI Urban PHC-ahte healthcare worker 500 hnenah pek tum a ni a, mahse, pek tum ang zat pek hman a ni lo. Aizawl CH-ah mi 54, ZMC-ah 77, Kulikawn Hospital-ah 64, ITI damdawi-inah 43 leh Lunglei CH-ah 76, a vaiin mi 314 pek a ni. 

Aizawlah chuan mipuite'n vaccine a him tâwk tih an rin ngam theihna turin Aizawl Civil Hospital medical superintendent Dr Lalhmuchhuaka hoin doctor 10-te a dawng hmasa tur zingah an in volunteer. Vaccine hi vawiin aṭangin Mizorama district tinah pek ṭan ve nghal a ni ang.

Dr R Lalthangliana chuan, Covid-19 donaah Mizoram chu India ram mai ni lo, khawvelah pawh a ti ṭha ber nia a hriat thu sawiin, "Ram hausa leh thiamna lamah pawh sang tak takte Covid-19 in a bawh bet a, an tláwm. A hmasa ber atan January 30, 2020 khan meeting neih a ni a, chumi aṭanga thla 10 leh a chanveah chiah meeting-ah rei tak inkhawm thei lo kohhran inkhawm remtih a ni a, limit awmin sikul kal phalna kan pe thei a, sumdawnna hrang hrang tan káwl a êng ṭan a ni," a ti. 

Covid-19 donaah a nêpzia a hriat thu sawiin R Lalthangliana chuan, "Pathian ropuizia a lang telh telh thung. Vaccine a lo thlen tâk avangin inthlahdah loh a ṭha, 100%-in kan him tihna a ni lo. Covid-19 ang rêng rênga Zo fate min pawt khawmtu ka hre lo. NGO, kohhran, chhungkua leh political party zawng zawng lungrual takin kan luang khawm hi a ropui tak zet a ni," a ti a; lungrual taka Zo fate an kal zel chuan kawng dangah pawh ramin hmasawnna a hmuh ngei tur thu a sawi.

Health Minister chuan, Aizawlah Covid-19 vei enkawl mek 57 an awm thu sawiin, "Hmun dangah hmalak chhunzawm loh tur tihna ni loin, Aizawlah uluk taka hmalak chhunzawm a ngai. Vaccine rawn thleng mah se hma kan la zel ang. Vaccine hi a ṭha tâwkah i ngai phawt ang u. Uluk taka duan a ni tih ring ngam ila. India sorkar hian a mipui chhiatna turin hma a la lo ang. Damdawite pawh ṭhenkhatin an ngeih laiin, ṭhenkhat chuan an ngeih lo thei tho a ni," a ti. 

Inkhawm kaihruaitu Health secretary H Lalengmawia chuan, Covid-19 donaah theihtawp an chhuah thu sawiin, "Sorkar mai ni lo, NGO, kohhran leh mipui kan ṭang rual tak zet. Duh ang leh fel famkim tak chuan kan ti hauh lo ang, theihtawp erawh kan chhuah a ni. Vaccine hi a pek hmasak dan indawt turah state sorkarin thutlukna a siam lo a, central sorkarin a hmasak dan indawt tura a tih angin pek tur a ni," a ti a; a tahtawlin vaccine chu pek a nih tur thu a sawi.

Vaccine chungchang sawifiahtu NHM mission director Dr Eric Zomawia chuan, vaccine 272 enchhin mek a nih thu sawiin, "Vaccine siam chhuak tur hian stage hrang hrang paltlang a ngai. India ramah chi hnih siam chhuah a ni a, Mizoram chuan Covishield kan chang. Vaccine pe tur hian kaihhruaina mumal tak siam a ni. Vaccine hi a him tâwk a ni tih mithiamte'n an sawi nasa a, mithiam pawh ni lo thusawi nazawng i ring lo ang u," a ti.

Dr Eric Zomawia sawi danin, Covid-19 vaccine hi India ramah ni tin mi nuai 100 pek tum a ni a, chumi atan chuan sorkar laipui a inpuahchah. Vaccine hi dose hnih (vawi hnih) pek tur a ni a, vawi khatna an dawn aṭanga ni 28-naah a vawi hnihna pek leh tur a ni. Vawi hnihna dawn aṭanga ni 14 hnuah vaccine chuan a thawh tur angin a thawk dawn chauh a, chuvang chuan vaccine late pawh an fimkhur zui zel a ṭul.