KHAWTHLIR

House-in pawm

Nimin Assembly session-ah ZPM member TBC Lalvenchhunga motion putluh "State Institute of Hotel Management building sak zawh tawh, hun rei tak chhung function loa awm hi, tualchhung miten ṭangkai zawka kan chhawr theihna turin chak taka hmalak ni se. A ṭul a nih chuan outsource turin emaw, GAD hnuaia ‘The Mizoram Government Land Pooling and Management Scheme’ anga a ṭul anga hman ṭangkai turin chak taka bawhzui ni rawh se" tih chu pawm a ni.

Piang leh thi chhinchhiah sawiho

Khawzawl District Level Coordination Committee on Civil Registration System chu an chairman K Vanlalṭhiana, district bawrhsap kaihhruaiin nimin khan an ṭhukhawm a; K Vanlalṭhiana chuan, piang leh thi zat ṭha taka chhinchhiah a nih loh chuan ram hmasawnna hnathawh thlengin a nghawng thu a sawi.

Ṭanpuina sem

Hnahthial district bawrhsap K Vanlalruati chuan nimin khan DC pisa tualzawlah Hnahthial DC Office, DSWO leh ALIMCO-te ṭangkawp kaltlangin rualbanlo mi panga leh kum 60 chunglam mi 133 hnenah an khawsak puihna tur hmanrua chi hrang hrang a sem a; K Vanlalruati chuan, khawtlang hruaitute chu an khaw chhunga hetiang hmanrua mamawhte bengvar turin a chah.

Mamit NCORD

Mamit district Narco Coordination Centre (NCORD) committee chu nimin khan additional DC Carolyn LB Khiangte kaihhruaiin an ṭhukhawm a; sikul leh college mai ni lo, khaw hrang hranga NGO leh khawtlang hruaitute nen ṭangkawpin ruihhlo ṭhat loh zia inzirtirna, awareness campaign chu nasa lehzuala kalpui an rel. Mamit district-a de-addiction centre siam turin hmalak mek a nih thu tarlan a ni bawk.

Zirlaite zirtir

Foundation For Drug-Free Mizoram chuan nimin zing khan Tuikual South High School-ah ruihhlo laka fihlim tura zirlaite zirtirna, 'Comprehensive Campaign for Substance Abuse, Prevention and Career Guidance for Youth in Mizoram' an buatsaih a; zirlai 77-te ruihhlo laka fihlim turin an intiam.

Jio tower

Lawngtlai district bawrhsap Donny Lalruatsanga kaihhruaiin nimin khan Power & Electricity Complex-a Jio tower dah tura ruahman, P&E Staff Welfare-ten inremna an hriatpui loh thu leh hmun danga dah an duh thu an thlen chungchang sawiho a ni a; P&E Staff Welfare chu kar khat chhung hun pek niin, thutlukna felfai tak siam tur leh Jio hotute nen lo inbe chhunzawm tura tih an ni.

Tuhna leh ramngaw humhalh sawiho

Champhai District Water & Sanitation Mission committee chu nimin khan additional DC Lalbiakfela kaihhruaiin an ṭhukhawm a; sorkar department hrang hrangten tuihna leh ramngaw humhalhna lam hawia hma an lak dan ṭheuh an tarlang a, PHE department-te nena an thawhho zel theih dan tur rawtnate an siam.