BEA nena thawhdun theih dan tur sawiho a ni; CM-in thawhdun hmasakna tura a duhte a sawi

Chief minister Lalduhoma hoin August 24, Thawhṭanni khan CM conference hall-ah sorkar hotute leh BRICS Entrepreneur Alliance (BEA) hotute an inkawm a; Chief Minister chuan, carbon trading, sawhthing sawngbawlna leh tourism-te chu Mizoram sorkarin BEA nena thawhdunna kalpui hmasak a duhnate an nih thu a sawi.

CM Lalduhoma chuan, Mizoram sorkar chuan BEA nena carbon trading, sawhthing sawngbawlna leh tourism lamahte thawhdunna kalpui hmasak a duh thu a sawi a; BEA lamin chak taka an rawn umzui avanga a lawm thu sawiin, BEA ruahmanna rawn siamte chu a ṭul ang zela bawhzui tur a nih thu a sawi a ni.

Ṭhutkhawmah hian BEA thawhpui firm/company hrang hrangte chuan Mizorama hma an lak theihna laite tarlan niin, Florata Bio Complex, Russia chuan Mizorama thlai tana an bio-stimulant siam hman ṭangkai kawnga hma an lak theihnate an sawifiah a; Maximeyz-ten tourism lama Mizoram pho chhuah leh hmalak theihna an neihte sawifiahin, Carbon Project Developer Jatin Kapur chuan carbon credit lama hma an lak theihnate an sawifiah bawk.

Carbon credit chungchangah hian carbon tihtlemna (carbon-removal projects) te, afforestation & reforestation (ARR) te, blue carbon, BECCS leh biochar-te sawifiah a ni a; thingtlang mite tana eizawnna siamsak te, carbon leh private investment hmanga sum leh pai tam tham tak Mizorama lak luh a nih theih dante sawi a ni.

Khualzin hip kawngah hian Mizoram chu Goa, Kerala leh Kashmir ang state hmingthang sa te nena inel loin, thil thar hmuh chhuah leh tawn thar (experience-led destination) lamah nasa zawka hmalak a ṭhat an ring a; sum ngah zual (High-Net-Worth Urbanites), corporate & tech lama thawkte leh Gen Z khualzinte a tam thei ang ber hip luh tum zawnga hmalak theih niin an ngai.

Isreal company aiawhten micro drip irrigation leh climate control green house te, drone enable logistics bakah security lama hma an lak theihnate an tarlang.

Sawhthing sawngbawl leh a hralhna tur market chungchang pawh sawiho niin, international market-a hralh theih dan turte an sawiho bawk.

Ṭhutkhawmah hian Hort-iculture minister C Lalsawivunga, EFCC minister Lalthansanga, Coope-ration minister PC Vanlalruata, Rajya Sabha MP K Laltluangkima, adviser to CM Lalmuanpuia Punte leh Dr KC Lalmalsawmzauva bakah, official dangte an tel.