School provincialised belh tum a ni - Education Minister

Nimin Assembly session-ah Education minister Dr Vanlalthlana chuan, Mizoram sorkarin tun hnaia sikul 51 dinhmun sanga a hlankai (provincialised) bak provincialised belh an tum thu a sawi.

MNF Member H Lalzirliana zawhna chhangin Education Minister chuan, school provincialised belh tumna a awm thu sawiin, "Kan buaipui mek a, Cabinet-in a ngaihtuah tawh. Ennawn mek a ni a, tih thuai kan tum. A criteria pawh Cabinet-ah kan enho vek tawh. Staff meeting-te koin hmalak chhoh mek a ni," a ti.

Result-ah pass 20% pawh nei lo, school building leh zirlai pawh nei lote sorkara lakluh an ba em tih an ngaihtuah thu sawiin Dr Vanlalthlana chuan, "An zirtirtute an sual hran lo maithei, harsatna an tawh chhan hrang hrang pawh a awm ang," a ti a, ngaihtuahna thuk tak an sen thu a sawi.

Education Minister sawi dangte :

☑ Zirlai inziaklut zat (enrollment) telh leh a ni. Hrut rual loin, municipal area (AMC leh LMC), district headquarters, SDO office neihna hmun leh a bak zawng chu 'a dangte' tiin dah a ni. Point an neih dan tur a awm dawn.

☑ Middle school awm miah lohnaa khawtlangin an enkawl sikulte a awm a nih chuan sorkarin a lak tihawm tak a ni

☑ An khuaah in awm a tam em, an khua aṭanga km engzatah sikul dang awm tihte en a ni dawn.

☑ Khaw pakhatah chuan high school awm reng tawhna, zirlai pawh an tam si lohnaahte sikul din belhte a awm tihte kan en dawn. Hengte hi an point a hniam deuhin ka ring

☑ Sikul la din lohna khuaa din chu an point a ṭha dawn

☑ Sikul upat dante pawh kan en dawn a, kum 30 chhung lo din tawhte chu an point a ṭha deuhin a rinawm