Supreme Court-in Mizo inneihna dan leh roluahna dan siamṭhatna khingtu High Court-ah kal turin a ti

Supreme Court chuan August 24, Thawhṭanni khan Mizo inneihna leh roluah dan siamṭhatna 'The Mizo Marriage and Inheritance of Property (Amendment) Act, 2026' khingtu Meriam L Hrangchal, Aizawl chu Gauhati High Court, Aizawl Bench-ah kal turin a ti.

Chief Justice Surya Kant, Justice Joymalya Bagchi leh Justice V Mohana te telna bench chuan, Meriam L Hrangchal aiawhtu counsel hnenah a client chu Supreme Court-a kal buai kher ngai loin, a chenna ngeiah High Court a awm tho avangin chutah chuan kal hmasa turin a hriattir.

Meriam L Hrangchal hian The Mizo Marriage and Inheritance of Property (Amendment) Act, 2026 chu India Constitution kalh a ni tiin Supreme Court-ah hian a khing a ni. He dan thar hian Mizo hmeichhia, Mizo ni lo mipa pasala neite chu dik lo takin a thliar hrang a, an fate dikna leh chanvo pawh a laksak a ni tiin ṭhiah a dil.

Dan thar hian hnam dan kum 2014-a siam Mizo Marriage and Inheritance of Property Act chu a thuam chak a, kawppui pakhat aia tam neih phal lohna te, Mizo mi leh Mizo mi ni lo inneihna (inter-community marriage) leh hmeichheten an thil neihte (property rights) chungchangah thil thar leh danglamnate a siam.

Law department changtu chief minister Lalduhoma putluh 'The Mizo Marriage and Inheritance of Property (Amendment) Bill, 2026' chu Februuary 26, 2025 khan Assembly session-ah lungrual taka pawm a ni.

Chief Minister chuan, dan hmasaa nupa 'inṭhen' chungchang chu dan siamṭhatah paih a nih thu a sawi a, "A hma kha chuan inneihna bakah inṭhenna dan a awm tel a ni. Kristiante chu inneihna tih hian dam chhung atana inkawp tura tih kan ni. Chuvangin, inneih leh ro inluahna dan tih mai ṭha kan ti. Inṭhenna dan siam hi a mawi lo e, tiin 'divorce' tih awm chu kan paih," a ti.

Nupa inṭhen vang emaw, thihna vanga nupui/pasal dang neih leh dawnin kohhranin inneih leh theihna an pek ṭhin thu sawiin Lalduhoma chuan, "Dan tharah hian nupui/pasal neih leh dawnin inṭhenna certifcate phût a ni tawh dawn. Nupui pakhat aia tam a neih theih dawn loh," a ti a; India ram dan Bharatiya Nyaya Sanhita (BNS) 2023 pawhin nupui pakhat aia tam neih a khap thu a sawi.

Bill-a tarlan danin, amendment bill atan hian Central YMA, MUP, MHIP, Mizoram Law Commission leh Mizoram State Commission for Women ten rawtna an thlen a ni.

Lalsangliani Colney pawhin May 8 khan Supreme Court-ah The Mizo Marriage and Inheritance of Property (Amendment) Act, 2026 khinna hi a thehlut tawh a, siamṭhat tur neuh neuh a awm avangin ngaihtuah tura chhawp chhuah a la ni lo.

DAN TIHDANGLAM ṬHENKHAT

✓ Dan hian Mizo mipa leh hmeichhia inneihna leh Mizo mipa leh hnam dang hmeichhia inneihna a huam.

✓ Mizo hmeichhiain hnam dang a neih chuan Mizo a nihna a tawp dawn a, an fate'n tribal an nihna an nei thei dawn lo.

✓ Inṭhenna chhan tlinga phâr natna telh ṭhin chu paih a ni. Phâr chu vanduaina thil a ni a, phâr natna vanga inṭhen chu chhan tling loa ngaih a ni.

✓ Dan hian autonomous district council-a Mizo dan hmangte a huam a, dan nei hrangte erawh chu a huam lo.

✓ Mizo ṭawnga awm, English-a dah ṭhin eng emaw zat chu Mizo ṭawnga dah a ni.