Draft School Drug Policy sawiho

Nimin khan Kolasib leh Serchhip district-ah bawrhsapte kaihhruaiin zirlaite ruihhlo laka invenna dan tur kaihhruaina duan mek, 'The Mizoram State School Drug Policy 2026 (Draft)' chungchang sawiho a ni.

Kolasib-ah chuan district bawrhsap H Dolianbuaia chuan zirlaite leh ṭhalaite zinga ruihhlo hluar chho mek chu pawi a tih thu a sawi a, "Kan ram leh hnam hmalam hun chu tunlai ṭhalaite leh sikul naupangte kutah a innghat a, ruihhlo laka kan zirlaite an him theih nana dan leh kaihhruaina mumal tak kan nei tur hi a lawmawm a, he policy hi a taka hman a nih hunah ṭangkai taka hmang a, a hlawhtlin nana theihtawp kan chhuah a ngai a ni," a ti a; dan duangtute leh a bawhzuitute an pawimawh dawn tih a sawi.

Bawrhsap chuan draft policy chungchangah hian ṭha tih zawng emaw, rawtna emaw neite tan District Education Officer (DEO) hnenah thehluh theih reng a nih thu leh ngaihtuahho theih a nih thu a sawi bawk.

Serchhip district bawrhsap Paul L Khuma chuan, ruihhlo chungchang inzirtirna chu chhungkua aṭanga bul ṭan a pawimawh thu a sawi a, "Nu leh pate tan pawh awareness neih a pawimawh a, school performance review & monitoring neih ṭhat te, awareness atan comprehensive study material/syllabus mumal tak neih te, drug kaihhnawih committee hrang hrang - NMBA, NCORD etc-te nena thawhhona mumal tak neih te, zirlaite ngei inhman theihna tur Anti-Drug Committee/club dinte chu policy-a telh makmawh a ni," a ti.

The Mizoram State School Drug Policy 2026 (Draft)

* Zirlaite tana him, thlawpna ṭha leh ruihhlo awm lohna zirna hmun siam tumna a ni.

* Mizoramah ruihhlo hluar lutuk avangin sikul chawlhsan, suahsualna leh rilru lam natna neihnate a thleng ṭhin a; kum 2019 data-in a tarlan danin, naupang kum 13 - 15 inkarah zuk leh hmuam ti 58% an awm.

* Policy hian a tum ber chu vaihlo, zu leh ruihhlo dangte tih tlem leh ven a ni a; hremna lam aiin zirtirna, puihna leh siamṭhat (rehabilitation) lam a ngai pawimawh.

* Ruihhlo bawiha tangte chu endawng an nih loh nan leh, theihna an neih anga sikul danga ṭha taka an luh chhunzawm leh theih nan ruahmanna a siam a ni.

* Zirlaite nunphung ṭha zawkah chherchhuak turin 'Life Skills' leh rualpawlna (interactive learning) hmanga zirtirna pek te, ruihhlo lam an hnaih dawn tih hriat lawk leh an zirlai a tlakhniam theihna laka ven (early intervention) leh an harsatnate hriatpui tura screening leh counseling neih chu he dan duan mekah hian ngaih pawimawh a ni.

* Policy hian hmalak dan tur hun tiam (deadline) a nei a, gazette-a tihchhuah a nih aṭanga thla riat chhungin zirtirtute tana training module siam tur a ni.

* Kum khat chhungin sikul tinin Health & Wellness Ambassador emaw, Counsellor emaw an nei tur a ni a, kum nga danah policy hi ennawn ṭhin a ni ang.