Ngenna kan thlen angin FCRA JPC-ah refer a ni - Duhoma

Nimin Assembly session-ah chief minister Lalduhoma chuan Foreign Contribution (Regulation) Amendment (FCRA) Bill, 2026 chu Mizoram Kohhran Hruaitute Committee (MKHC) leh Council of Churches in Mizoram (CCM) te nena ngenna an thlen angin Joint Parliamentary Committee (JPC) ah refer a nih thu House a hrilh.

MNF member K Laldawngliana'n FCRA Bill chungchanga Mizoram sorkar ngaihdan a zawhna chhangin Chief Minister chuan, "FCRA Bill 2026 chungchangah hian Mizoram sorkar, MKHC leh CCM aiawhin August 6, 2026-ah Union Home Minister hnenah joint memorandum thehluh a ni. He memorandum-ah hian bill hi withdraw leh tur te, withdraw a rem lo a nih pawhin siamṭha leh turtein point hrang hrang thehluh a ni," a ti.

Chief Minister tarlan danin, August 6 hnu, August 9-ah Union Home Minister hnenah he bill hi pass loa JPC-ah refer mai turin CM, MKHC leh CCM hmingin ngenna thlen leh a ni. He ngenna ang hian August 12, 2026-ah he bill hi JPC-ah refer a ni ta a ni.