HIV kai mahni dinhmun hre lo mi 3,000 chuang an awmah ngai

Special Committee on Resolute Action against HIV/AIDS (SCORAAH) chu nimin khan MSACS office-ah an ṭhhukhawm a; Mizoramah HIV Estimation & Prevalence (HIV vei mek awm tura ngaih zat leh tun dinhmuna HIV kai awm mek aṭanga chhûtin mahni dinhmun la hre lo mi 3,000 chuang la awma ngaih a nih thu tarlan a ni.

SCORAAH ṭhut-khawmah hian Mizorama HIV positive-te a rang thei ang bera hmuh chhuah theih dan tur te, HIV vei (PLHIV) enkawl mekte’n ṭha taka enkawlna an dawn theih dan tur te, enkawlna hnuaia hrisel taka rei tak an dam theih dan tur leh HIV inkaidarh tur venna kawng hrang hrangte sawiho a ni a; tun dinhmunah Mizorama HIV Estimation & Prevalence (HIV vei mek awm tura ngaih zat leh tun dinhmuna HIV kai awm mek) aṭanga chhûtin mahni dinhmun la hre lo mi 3,000 chuang an la awm nia ngaih a nih thu an sawi.

Tarlan danin, Mizorama HIV positive hmuh chhuahte zingah HIV an vei tih hmuh chhuah tlai (delayed detection case; Baseline CD4<350 cells/ mm3) hi 59% vel niin, hemi avang hian ART enkawlna dawng hman lo leh enkawlna dawng rei hman loa thi an awm ṭhin. Tun dinhmuna Mizorama HIV vei enkawl mek zinga engemaw zat damdawi ei mumal lo leh ei ṭha duh lo an awm bawk.