Governor hmalaknain MSCI-in Cancer screening test kit a dawng

Mizoram State Cancer Institute (MSCI), Zemabawk chuan tun hnai khan USA aṭangin cancer screening test kit 3,875 an dawng a; test kit-te hi Governor Gen. Dr Vijay Kumar Singh hmalaknain Dr Dahiya leh Dr Chauhan-ten MSCI hnenah an rawn pe a ni.

Sorkar thuchhuah tarlan danin, cancer screening test kit hrang hrang lo thlengte hi thin cancer vei leh vei loh enfiah (screening) tihna Alpha Feto Protein test kit 975, rilpui cancer vei leh vei loh screening tihna Carcinoembryotic Antigen test kit 950 leh Fecal Occult Blood test kit 975 bakah, prostate cancer vei leh vei loh screening tihna Prostrate Specific Antigen test kit 975 a ni.

Gen. Dr Vijay Kumar Singh chuan, mipui hriselna chu state hmasawn nana pawimawh hmasa a nih thu a sawi a, "Cancer tamna leh thihpui tamna state kan ni hi a veiawm hle a, cancer hmuh chhuah vata enkawlna ṭha pek chu thil pawimawh tak a ni," a ti a; USA aṭanga a thlawna test kit dawnte chu ṭangkai taka hman a nih ngei a beisei thu sawiin, Mizoram mipuite hrisel nan theihtawp chhuah zel a tum thu a sawi.