COVID-19: Mizoram dinhmun Ni 2 chhungin hri vei 12 hmu

Mizoramah January 15, Zirtawpni khan Covid-19 vei mi pali hmuh chhuah a ni a, Inrinni khan mi pariat hmuh chhuah a ni bawk. Inrinni leh nimin khan hripui laka fihlim tawh mi 10 chhuahtir niin, chhuak tawh zawng zawng chu mi 4,235 (97.99%) a ni.

Covid-19 laka fihlîm tawh Inrinnia chhuahtirte chu mi pathum an ni a, nimina chhuahtirte chu mi pasarih an ni.

Mizorama Covid-19 vei hmuh chhuah tawh chu mi 4,322 an ni a, mipa 3,168 leh hmeichhia 1,154 an ni. Nimin tlai dar 5 thleng khan damin mi 4,235 (97.99%) chhuahtir an ni tawh a, mi pakua (0.21%) thi tawhin, enkawl mek mi 78 (1.80%) an awm. 

Covid-19 vei hmuh chhuah tawh mi 4,322 zinga mi 2,045 chu Mizoram chhunga kái chhâwng an ni a; mi 2,277 chu Mizoram páwn aṭanga an rawn luh hnua hmuh chhuah an ni. 

January 16, Inrinni thleng khan Mizoramah swab sample 1,92,766 endik a ni tawh a, chu'ng aṭang chuan Covid-19 positive mi 4,322 hmuh chhuah niin, endik zat aṭangin 2.24% a ni.

Mizorama district 11 zinga panga - Siaha, Champhai, Serchhip, Mamit leh Hnahthial district-ahte Covid-19 vei an awm rih lo.

Sorkar thuchhuah tarlan danin, Covid-19 vei January 15, Zirtawpnia hmuh chhuahte chu ZMC laboratory-a hmuh mi pathum leh Rapid Antigen Test (RAT) hmanga hmuh pakhat an ni a; TrueNAT-PCR hmanga swab sample endik zingah hripui vei an awm lo.

ZMC laboratory-a Covid-19 vei hmuh chhuahte chu mipa puitling vek an ni a, Aizawl district-a swab sample lak vek niin, symptom nei an awm lo. An zinga pahnih chu Mizoram chhunga hri kai an ni a, pakhat erawh chu tun hnaia state pawn aṭanga rawn lut a ni. RAT hmanga hripui vei hmuh chhuah pakhat pawh tualchhunga hri kái, a kàina hriat loh a ni.

January 15-ah hian ZMC Covid-19 laboratory-ah mi 382, TrueNAT-PCR hmangin district pakuaah mi 124 leh RAT hmangin district pasarihah mi 384 endik a ni a; swab sample endik zawng zawng chu 886 niin, chuta ṭanga Covid-19 positive hmuh chhuah pali chu 0.45% a ni.

January 16, Inrinnia Covid-19 positive hmuh chhuah thar mi pariatte chu mipa leh hmeichhia pali ve ve an ni a; ZMC-a hmuh mi paruk leh RAT hmanga hmuh mi pahnih an ni. TrueNAT-PCR hmanga sample endik zingah hripui vei an awm lo.

ZMC laboratory-a RT-PCR hmanga hripui vei hmuhte chu mipa leh hmeichhia pathum ve ve, kum 17-53 inkar an ni a, Aizawl district-a sample lâk vek an ni. An zinga pakhat chu tualchhunga hri kái a ni a, mi panga chu tun hnaia state páwn aṭanga rawn lut an ni thung.

RAT hmanga hripui vei hmuh thar pahnihte chu tualchhunga hri kái ve ve an ni a, hri an kaina tak hriat a ni lo.

January 16-ah ZMC Covid-19 laboratory-ah mi 385, TrueNAT-PCR hmangin district pasarihah mi 122 leh RAT hmangin district pakuaah mi 384 endik a ni a; sample endik zawng zawng chu 784 niin, chuta ṭanga Covid-19 positive hmuh chhuah pariat chu 1.02% a ni.

Ramthar North - 1: Mipa kum 31, Karimganj aṭanga haw, home quarantine lai, symptom nei lo.

MP Khaitan company - 2: Mipa kum 28 & 47; ZMC-a construction work thawktu, Covid-19 free certificate neih duh vanga sample test, hri kaina hriat loh.

Lawngtlai College Veng - 1: Mipa kum 20, zirlai, hostel luh hun hnaih vanga sample endik a ni. Tualchhunga kái, hri kàina hriat loh, symptom nei lo.

Ramthar North - 1: Hmeichhia kum 28, tualchhunga kai, Durtlang BSUP CCC-a +ve naupang awmpuitu, symptom nei lo.

Tuikual South - 4: Mipa kum 17 & 53 leh hmeichhia kum 21 & 43, chhungkaw pakhata awm. West Bengal-a chawlh hmang zo rawn lêt leh, home quarantine lai, symptom nei lo vek.

Zarkawt - 1: Mipa kum 47, tun hnaia Assam aṭanga rawn lut, home quarantine lai, symptom nei lo.

Ramlaitui - 1: Mipa kum 22, driver, accident vanga Aizawla private hospital pakhata inentir tura kal, screening point-a +ve tih hmuh chhuah, hri kàina hriat loh, symptom nei lo.

Kolasib Venglai - 1: Hmeichhia kum 52, staff nurse (frontline worker), Zawlnuama zin haw, symptom nei lo.