Mizo hnam dân Supreme Court-a khingtu kan dem tak zet - MZP
MZP executive chu nimin khan an pisaah an ṭhukhawm a, "Supreme Court-a Mizo hnam dan, The Mizo Marriage & Inheritance of Property Act, 2026 khingtu kan dem tak zet," an ti.
MZP chuan, "Tun hnaia Supreme Court hiala Mizo hnam dan, The Mizo Marriage & Inheritance of Property Act, 2026 khing duhtu Mizo nu ni ṭhin, hnamdang pasal nei ta chu kan dem tak zet. Kum 2015 aṭang khan MZP chuan hnamdang nupui pasal nei lo tura inzirtirna kan lo hmang tawh ṭhin," an ti a, hnamdang pasal neite chungchangah an ngaihdan a la ngai reng tih an tarlang.
MLA election dawnah pawh political party tinte hnamdang pasal nei ticket pe lo tura an lo ngen tawh thu tarlangin MZP chuan, "Tuna Supreme Court-a khingtu hi political party pakhatin MZP-te ngenna zah loin ticket an pek luih avangin Aizawl khaw chhungah kawng zawh pawh kan lo buatsaih tawh a ni. Political party hrang hrangte pawh heng mite hi eng inthlanah pawh theh chhuak lo turin kan ngen nawn leh a ni," an ti.
MZP ṭhukhawm chuan, MZP-in a kum 2015 aṭanga September 2 apianga an lo hman ṭhin, hnamdang nupui/ pasal nei lo tura inzirtirna ni chu kumin pawh hian hman leh nise, sikul hrang hrangah thusawina hun ni se an ti a, Zirtirtute Ni (Teachers' Day) ah MZP-in kumtin a a tih ṭhin angin, zirtirtute zahna thu ziak Aizawl chhung hmun hrang hrangah tar leh nise tiin an rel.
Tlabung khua chu hmanlai aṭanga tun thlengin Mizote khua a ni tih MZP chuan tarlangin, "Tlabung chu Chakma-te khaw hlun leh an lo luahlum tawh ṭhin anga sawi awm hi kan pawm lo. Ṭhangtharte rilrua history dik lo tuh tumna leh Mizoram mipui zah lohnaah kan ngai. Mizo lalte'n an ram leh an ram luah chinte an humhalh nasat em avangin, eng ti kawng mahin Tlabung chu Chakmate khua a ni thei ngai lo," an ti.
Ṭhutkhawmah hian August 31, 2026-a MZP rorelna sang ber dawttu Federal Council-a an agenda tur an thlifim nghal a, agenda tur 11 pawmin, chung zingah chuan 'The Mizo Marriage and Inheritance of Property (Amendment) Act, 2026 khauh taka kengkawh a, hnamdang thlahten scheduled tribe (ST) chanvo an chuh ve loh nan hmalak ni rawh se' tih an tel.