East-II MLA-in naupiang lawmpuina a sem; 'Naupian pun indopui kan puan a ngai' - B Lalchhanzova

Aizawl East-II Bialtu MLA B Lalchhanzova, MoS chuan nimin aṭang khan a thawh nga nan a bial chhunga naupiang lawmpuina a sem ṭan a, naupian pun indopui puan a ngaih thu a sawi.

B Lalchhanova chuan tun dinhmunah Mizorama nu pakhat zelin nau 1.87 hring ang an nih thu sawiin, "India ram pumpui pian dan 1.99 aiin kan hniam mek a, hnam ral lo tur chuan nu-in nau 2.1 ang tal an hrin a ngai a ni. Pianpun kan mamawhzia chu hei hian a ti chiang hle. Pianpun mamawhmawh zia tarlan nan leh piang pung tura ṭan kan lakna chikhat atan hetianga naupiang lawmna thilpek hi buatsaih ka ni," a ti.

Pianpun hi hnam anga kan vei ngai tak, sorkar, kohhran leh tlawmngai pawlten thukhat vua a kan ṭan tlanna tur a nih thu sawiin B Lalchhanzova chuan, "Mizo hnam a ral lohna atan naupian pun indopui kan puan a ngai. Kan state chhung hi kan la thawl em em a, sq km khatah mi 52 chauh kan la chenga, India ram pumpuiah erawh chuan sq km khat zelah mihring 430 cheng ang kan ni. Pung zel turin ram kan la nei zau," a ti a, tam ila Mizo hnam kan zahawm sauh sauh tur thu a sawi.

B Lalchhanzova'n a bial chhunga December 2023 aṭanga naupiang lawmpuina a pekte chu mi 614 an tling tawh a, naupiangte hi Rs 1,000 leh thuziak a pe zel a ni. Nimin aṭanga a thawh ngana atana a pek tur December 2015 aṭanga June 2026 chhunga naupiang lmi 131 te nen chuan an vaiin mi 745 an ni. A thawh ngana atan naupiang 131 te lawmpuina hun bulṭanna chu HJ Rodinga in, Armed Vengah ṭan a ni.