Kolasib DFO-in ngaih hnathiamna awm loh thla atan September a puang

Environment, Forests & Climate Change (EFCC) department hnuaia Kolasib Forest Division chuan, September 2026 chhung hi ramngaw leh nungcha humhalhna kaihhnawih dan bawh-chhiate chunga ngaih hnathiamna lantir loh thla (zero tolerance month) atan an hmang dawn.

Kolasib divisional forest officer (DFO) PC Lalṭanpuia chuan thuchhuah siamin, Kolasib Forest Division chu thing (timber) tamna hmun a nih avangin dan loa thing kih, zai leh tawlh rûk a awm reng ṭhin tih a tarlang a, "Ramsa leh sava te dan loa tihhlum te, an sa zuar leh an taksa peng (lu, mei, hmul leh a dangte) kawl an awm fo ṭhin," a ti.

Dan bawhchhiatnate titawp tur hian department chuan theihtawpin hma a la ṭhin tih tarlangin PC Lalṭanpuia chuan, "Mahse, duh angin hmalakna a hlawhtling tawk thei rih lo a, dan bawh­chhetu man chhuahte hi mi harsa zawk an lo nih fo avangin dan ang taka hrem mai loin, khawngaihna leh hriatthiamna lantir a ngai fo ṭhin," a ti a; hetianga hriatthiam an nihna hi hmang sualin dan bawhchhetute a tingampa zawk mah tih hriat chhuah a nih thu a tarlang.

DFO chuan, "Hetiang a nih avang hian September, 2026 chhung hian Kolasib Forest Division huam chhungah 'Zero Tolerance Month' hman a ni dawn a, he hun chhunga dan bawhchhia mante chu dan ang thlapa hrem an ni ang a, ngaih hnathiamna reng reng a awm tawh lo ang," a ti bawk.